2239/2024-2025
2024 Mimkut thla ni 26: Doordarshan Kendra (DDK) Mizoram, Mizoram Indigenous Games Association (MIGA), Young Mizo Association (YMA) Lunglei Sub-Headquarters leh Mizoram Journalists' Association (MJA) Lunglei District te thawk ho huaihawt ni hnih awh tur tualchhuak infiamna hmanga Lunglei Sub-Headquarters hnuaia YMA branch hrang hrangte inelna, "Doordarshan Mizoram Indigenous Games 2024 (Inter-Branch Competition, Lunglei District) chu vawiin chawhma dar 10:30 khan Lunglei High Powered Committee (HPC) Vice Chairman Pu V. Malsawmtluanga MLA chuan Chanmari Hall, Lungleiah a hawng.
Khuallian Pu V. Malsawmtluanga chuan hnam anga din chhuahna kawngah pi pute aṭanga inhlan chhawn tualchhuak infiamna (indigenous games) pawimawhzia sawiin, he'ng infiamnate hi hnam ziarang, incheina leh nun ze mawi chawi nungtu pawimawh tak a ni, a ti a. Kalphung thar, mipui sawrkarin a tum chu hnam anga a hlawma din chhuah a nih thu sawiin, chumi tihhlawhtlin nan chuan infiamna lama hmasawn turin hmunhma leh hmanraw ṭha ngaihtuah bakah, ṭhalaite theihna leh thiamna tipung tura hma lakna ruahman a nih thu leh thingtlang kilkhawr zawkah pawh zirtirtu (coach/trainer) ṭha tira hma lak tum a nih thu a sawi a. Lunglei District-ah pawh infiamna lama hma sawnna turin sawrkarin theih tawp a chhuah dawn tih sawiin, Lungleiah world class hockey field siam tura ruahmanna siam mek a nih thu a sawi a. Ṭhalaite chu zirna emaw, infiamna emaw, ei zawnna emaw, kawng tinrengah mi baka thawh rim chu hlawhtlinna kailawn pawimawh ber pakhat a ni tih hre tura chahin, Zo nun ze mawi leh hnam ziarang pho chhuah leh chawi nunna hmanrua ni tura duhsakna hlan chungin tualchhuak infiamna hmanga inelna chu a hawng a ni.
Lunglei District-a DD Mizoram Indigenous Games 2024 hawnna inkhawm hi DDK Aizawl-a Programme Executive & MIG Producer Pu T. Siama chuan kaihruaiin, DD Mizoram Indigenous Games chu February 2024 aṭanga ṭanin district hrang hranga buatsaih a nih tawh thu leh Lunglei District chu district pakuaa an buatsaihna a nih thu a sawi a. DD Mizoram Indigenous Games 2024 chu sawrkar laipui Ministry of Information & Broadcasting hnuaia Broadcasting Infrastructure and Network Developement (BIND) scheme kal tlanga buatsaih a nih thu leh district tina buatsaih a nih hnuah Aizawlah district ai awhte tan state level inelna buatsaih a nih dawn thu a sawi.
He hunah hian Lunglei Sub-Headquarters YMA Sports Committee Chairman Pu Francis Lalnuntluanga Ralte chuan inlawmna thu sawiin, Lungleia indigenous games buatsaih tura an hma lakna leh an inbuatsaih dan te a tar lang a. Sub-Headquarters YMA Vice President Pu CMS Dawngliana pawhin thu sawiin, indigenous games chu YMA kumpuan, "Ram leh hnam humhalh" tih nen pawh thil inhmeh tak a nih thu leh hun lo kal zel turah pawh YMA member-te'n an ngaihhlut chhunzawm zel ṭul a tih thu a sawi.
He hunah hian Lunglei Municipal Council (LMC) Vice Chairman, Chanmari Ward councillor Pu K. Lalrinawma bakah, a buatsaihtu DDK, MIGA, Sub-Headquarters YMA leh District MJA-a hotute leh hruaitute, sawrkar official leh khawtlang hruaitu sawm bikte, inelnaa tel tur leh anmahni ṭawiawmtu YMA branch hrang hrang hruaitute leh member-te leh he hun ngaihlutu mipui eng emaw zat an tel a ni.
Ni hnih awh tur Lunglei Chanmari Hall-a Mizoram Indigenous Games Inter-Branch YMA Competition buatsaihah hian Lunglei Sub-Headquarters huam chhunga YMA branch 17 aṭangin infiam mi an tel a. Mizo infiamna chi nga - inbuan, insaihruipawh, insuknawr, inarpathai leh inkawibah te hmangin inelna buatsaih a ni a. Inbuan, insuknawr leh insaihruipawh te hi mipa mimal inelna niin, he'ng item thumah hian category 3 zel - (1) Pa te (kg 75 hnuai lam), (2) Pa laihawl (kg 75 - 90 inkar), leh (3) Pa lian (kg 90 chung lam) a awm a. Inarpathai hi mipa team inelna niin, team khatah mi 5 zel an awm a; inkawibah hi hmeichhe team inelna ni thungin, team khatah mi 6 zel an awm thung.
District level MIG-a item hrang hranga pakhatna aṭanga pathumna te hian November thlaa Aizawla State Level Mizoram Indigenous Games Competition buatsaih turah district ai an awh dawn a ni.
Attachment
- Loading attachment...
