2240/2024-2025

Dated Aizawl, the 26th September, 2024: Lok Sabha Speaker Pu Om Birla, Rajya Sabha Deputy Chairman Pu Harivansh Narayan Singh leh Official pawimawh hrang hrangte chuan September ni 27 & 28, 2024 chhunga Commonwealth Parliamentary Association (CPA), India Region, Zone-III Annual Conference vawi 21-an hmang turin vawiin khan Aizawl an rawn thleng.

Lok Sabha Speaker leh Rajya Sabha Deputy Chairman te hi Mizoram Speaker Pu Lalbiakzama, Lok Sabha MP Pu Richard Vanlalhmangaiha, Deputy Speaker Pu Lalfamkima leh Official dangte'n an lo dawngsawng a ni.

Ruahman lawk ang chuan zanin dar 7:00 hian Mizoram Legislative Assembly Committee Room-ah Executive Committee Meeting an nei nghal ang a. Naktuk September ni 27 (Ningani) chawhma dar 11:00 ah Lok Sabha Speaker Pu Om Birla chuan MLA Library-a Archive Cell thar a hawng ang a, dar 11:30 ah Commonwealth Parliamentary Association Annual Conference hman zui a ni ang. Mizoram Speaker Pu Lalbiakzama'n palai zawng zawngte lawmna thu a sawi zawhah Nagaland Speaker leh CPA Zone-III Chairman ni bawk Pu Sharingain Longkumer-in keynote address a sawi ang a; Mizoram Chief Minister Pu Lalduhoma, Rajya Sabha Dy. Chairman Pu Harivansh Nayaran Singh leh Lok Sabha Speaker Pu Om Birla te'n thu an sawi zui dawn a ni. A ni khatnaah hian 'Inclusion of the Northeast Region in the India-ASEAN Vision for Trade and Cooperation' tih chu an sawiho dawn a ni.

CPA Annual Conference ni hnihnaah 'Merging the Ministry of DONER with NEC for better strategic planning and coordination of various projects in the region' tih sawiho a ni ang a. Hemi hnu hian Conference kharna hun hman a ni ang a, Speaker Pu Lalbiakzama leh Chief Minister Pu Lalduhoma te'n thu an sawi hnuah Mizoram Parliamentary Affairs Minister Pu Vanlalhlana'n lawmthu sawina hun hmangin Conference a khar dawn a ni.