4292/2024-2025

Lunglei, 2025 Ramtuk thla ni 17: Vawiin khan National Institute of Electronics & Information Technology (NIELIT) Aizawl leh Mizoram Police te ṭang kawpin Lungleia Superintendent of Police office-a computer zirna hmun, Police Computer Training Centre an buatsaih chu Lunglei High Powered Committee (HPC) Vice Chairman Pu V. Malsawmtluanga chuan a hawng.

Lunglei HPC Vice Chairman Pu V. Malsawmtluanga chuan police mai ni lo, sawrkar hna thawkte'n an chhawr theih tur Lunglei SP office-ah computer training centre buatsaih leh hawn a ni ta chu lawmawm a tih thu sawiin, hma latu NIELIT leh Mizoram Police te, a sum tumtu Ministry of Electronics & Information Technology te chungah lawm thu a sawi a. Khawvel changkang zelin thiamna thar a her chhuahpui a, chumi mil chuan upa zawkte pawh inher rem ve zel a ṭul tih sawiin, a bikin police te chu intuai thar reng a ṭul zual, a ti a. Lunglei police te'n hnu chhuina lama hmasawnna nasa tak an nei chu lawmawm a tih thu leh an thawh rimna fakawm a tih thu sawiin, computer training centre thar chu hna thawhna atana an mamawh thiamna an neih belhna tur hmanraw ṭangkai tak a nih tur thu a sawi a. Thiamna sang zelin sualna kawngka a hawng zau zel a, a man chhuahna atan thiamna thar hman dan zir thiam ve zel a ṭul tih sawiin, mipui himna leh ralmuanna atana thawktu police te chu hmanrua leh thiamnaah a ṭha thei ang bera thuam an pawimawh avangin Lunglei Police thuam chakna atana an mamawh leh rawtna an thlente chu HPC aṭang pawhin a theih ang anga an bawhzuisak tur thu a sawi a ni.

He hunah hian Lunglei SP Pu J. Lalmuankima chuan hmasawnna tluang taka a kal theih nan dan leh thupek kenkawhna lam ngaih pawimawh a ṭul tih sawiin, sawrkarin a theih ang anga police te a ngaihtuah a, a thuam chak chu lawmawm an tih thu a sawi a. Lunglei khawpui chhunga lirthei khalhtute him zawk nan HPC aṭanga kawngpui chhinchhiahna rin leh eng (road divider & stud) vuahna tur ruahman a nih avang leh building thawm ṭhatsak an nih avanga lawm thu sawiin, Lunglei District Legal Services Authority te nen ṭang kawpin lirthei chet velna kawnga hriat tur ṭul inzirtirna (traffic awareness) video siam mek a nih thu a tar lang bawk.

He hun hi Lunglei Additional SP Pu K. Beihmotaosa chuan kaihruaiin, Lunglei SP office-a VDO Pu C. Lalruata'n hunserh a hmang a. NIELIT Aizawla Director Dr T. Gunendra Singh hnen aṭangin thu sawi ngaihthlak niin, NIELIT Aizawla Principal Technical Officer Pu Lalrempuia Sailo chuan technical report a pe a ni.

Lunglei SP Office-a Police Computer Training Centre hawn thar hi India hmarchhaka police te leh sawrkar hna thawkte'n internet kal tlanga pawi khawihna chungchang leh inven him dan te, tun lai thiamna hmanga pawi khawihtu chhui chhuah dan te an thiam theih nana zirtira thuam chak tura Ministry of Electronics & Information Technology hnuaia hma lakna niin, Mizoramah Police Headquarters-ah leh Lunglei SP office-ah State-of-Art Computer Laboratory hi dah a ni a. He laboratory hi computer set leh khawl changkang leh him ber bera thuam niin, 75 inch Interactive Smart TV bakah power backup ṭha tak dah tel a ni bawk a. Police mai bakah sawrkar hna thawkte pawh he hmunah hian training pek ṭhin tura ruahman a ni.