4293/2024-2025

Lunglei, 2025 Ramtuk thla ni 17: Vawiin khan Lunglei District Chapchar Kut 2025 Organising Committee chu an Chairman, Additional Deputy Commissioner Pi Rochuangkimi Khenglawt hovin a hna thawh pindanah an ṭhu khawm a. Chapchar Kut huaihawt tura thil pawimawh hrang hrang an sawi ho.

He hunah hian Organising Committee Co-Chairman, Lunglei Sub-Headquarters YMA President Pu K. Lalfakzuala bakah, member dang - DC office, Art & Culture, Horticulture leh I&PR official-te, Mizo Cultural Organisation (MCO) Sub-Headquarters leh Mizo Cultural Artistes' Association (MCAA) Sub-Headquarters ai awhte an tel a. Secretary, Sub-Headquarters YMA Secretary Pu Zothanzuala Hnamte hnen aṭangin kum hmasa lama Chapchar Kut hman dan report ngaihthlak niin, hun hman dan tur chipchiar leh chanvo neitu tur te ruahman a nih bakah, Kut huaihawtna atana mawhphurhna hrang hrang chelhtu tur te ruat a ni bawk.

Kumin Chapchar Kut hi "Zo nun ze mawi - Hawihhawmna" tih thupui hmangin March ni 7, 2025 (Zirtawpni) hian Lungleia C. Ṭhuamluaia Mualah hman tura ruahman a ni a. Lunglei Bawrhsap Pi Navneet Mann chu Kut Thlengtu tur niin, Kut Nu atan Health & Family Welfare Minister Pi Lalrinpuii beisei a ni a. Chapchar Kut ni hian hnam lam chi hrang hrang thlir tur leh zaithiamte zai ngaihthlak tur a awm dawn a. Hnam ziarang tar lang leh chawi lar tur zawnga hun hmang leh turin Organising Committee chuan ruahmanna a siam a ni.