1862/2026-2027

Lunglei, 2026 Thlazing ni 19: Vawiin khan District Treasury Office, Lunglei huaihawtin Lunglei Convention Centre Hall-ah Mizoram sawrkar hnuaia dan dik lova family pension late'n mahni duh thua pension an tihtawp theihna tura Mizoram sawrkarin ngaihhnathiamna hun a hawn mek chungchang inhrilhfiahna, "District Level Sensitisation Programme on Voluntary Surrender of Pension Payment Orders (PPOs)" buatsaih a ni a. Lunglei High Powered Committee (HPC) Vice Chairman Pu V. Malsawmtluanga, MLA (Lunglei North) chuan Khuallian niin a hmanpui.

Khuallian Pu V. Malsawmtluanga chuan ram kalphunga siam ṭhat ngaite siam ṭha tur leh diknain ro a rel a, mi rethei chhumchhiate'n an chanvo an chan theih nan Mizoram sawrkar chuan theih tawpin hma a la tih sawiin, State sum dinhmun a insawh ngheh theih nan sawrkar chu inrenchem taka kalin, sum leh paiah a rah chhuah hmasawnna hmuh chhoh mek a ni, a ti a. Revenue expenditure chu sawrkar inrelbawlna tur ringawt ni lovin, mipui hnena service ṭha zawk pek a nih theih nana ruahmanna a nih thu sawiin, mipuite'n kan chanvo dik tak dawng chungin inrenchem leh ṭul lova sum luang ral tur dan a nih theih dan tur sawrkar chuan a ngaihtuah reng tih a sawi a. Ram siam ṭhat hna kalpui mekah sawrkar hna thawkte an fakawm a tih thu sawiin, a bik takin Finance lama thawktute'n huaisen taka sawrkar hma lakna an thlawp chu an fakawm a tih thu a sawi a. Sawrkar chuan upate a ngai pawimawhin, an hamṭhatna tur theih tawpin a ngaihtuah tih sawiin, State sawrkarin tar pension a do letna ₹100 ni ṭhin chu ₹1,000-ah tihpun a nih thu leh pension paper fel tawh, sum la pek chhuah loh sing tel chu rei lo te chhunga tihfel a nih thu a sawi.

Khuallian Pu V. Malsawmtluanga chuan an ṭhat lai hun zawng zawng ram leh sawrkar tana hlantu pensioner-te sawrkarin a chhuang tak zet tih sawiin, chutih rual chuan pensioner chhungte'n sawrkar aṭanga hamṭhatna an dawna felhlel awm ṭhin chu siam ṭhat a, dik taka kal a duh avangin sawrkar chuan ruahmanna a siam tih a sawi a. Dan dik lo leh lehkha dik lo siam chawp hmanga Family Pension lak chu sim tur leh siam ṭhat tur lian tak a nih thu sawiin, ṭhenawm khawveng induhsaknaa dan dik lova thil tih chu a malsawm loh bakah, ram tan a pawi theih avangin hriatpuina pe chhuaktute pawh fimkhur turin a chah a. Dik lo taka family pension late chu sawrkarin ngaihhnathiamna hun a hawn chhung, September 2026 ral hmaa an PPO theh lut tura ngenin, hemi chhunga theh lutte chu an lo tihdik loh pawh sawrkarin a ngaidam vek dawn tih a sawi a. Hun tiam chhunga theh lut lo, Task Force te'n man chhuah an neih chuan sawrkarin thubuai a siamsak dawn bakah, an pension lak tawh rulh lettir an nih dawn thu sawiin, certificate dik lo hmanga pension latu leh certificate lem siamsaktu te lakah khauh taka hma lak a nih tur thu a sawi a. Dik taka pension late tan erawh eng mah hlauh tur a awm lo tiin, kal khawmte chu an thil zirte zawm a, mi dang hnena pu darhtu ni turin a chah. 

Accounts & Treasuries (A&T) Southern Zone-a Joint Director Pi Lalremtluangi chuan inlawmna thu sawiin, dik lo taka family pension lak chu dik lo taka sawrkar sum hmanna leh luan ralna a nih bakah, khawtlang leh mipui pawhin an ngaimawh hle tawh tih a sawi a. Family pension chu ro khawm anga khawm theih ni lo, danin la thei a tihte chauhvin an lak theih a nih avangin pensioner chhungte'n an sum a thlawna luang ral tura an ngaihna chu an sum a ni lo tih an hriat a ṭul tiin, hriatpuina pe chhuaktu Local/Village Council, Kohhran leh NGO-te chu dik taka thil tih a nih theih nan fimkhur taka an hriat chian leh a dik tih an finfiah te chauh hriatpuina pe turin a chah a. Sawrkar office-a pension khawihtute pawh mawh la ngam tura fimkhur leh uluk taka lehkha theh luhte endik ṭhin tura chahin, dik taka thil tih a nih theih nan mawhphurhna nei zawng zawngte ṭan ho a ṭul thu a sawi.

PPO Voluntary Surrender chungchang inhrilhfiahna hi Lunglei District Treasury Office-a Accounts Officer Pu H. Lalrintluanga'n kaihruaiin, Accounts Officer Pi C. Laldingliani'n District Treasury Office report a pe a. A&T Southern Zone-a Assistant Audit & Accounts Officer Pu B. Lalnunsiamkima chuan PowerPoint presentation hmangin family pension lak theih dan leh PPO Voluntary Surrender chungchang a zirtir a. Zawhna leh chhanna leh sawi hona hun hman ni bawkin, Treasury Office-a Accounts Officer Pi Rosy Laldikkimi'n lawm thu sawiin hun a khar.

PPO Voluntary Surrender chungchang zir honaah hian Lunglei District chhunga sawrkar office hrang hrang ai awh leh Lunglei District Pensioners Association (LDPA) hruaitute, Lunglei Municipal Council (LMC) huam chhunga Local Council tin ai awh te, Lunglei District chhunga Village Council thlan bik ai awh te, Lunglei khawpui chhunga Kohhran Headquarters puipa leh tualchhung kohhran tin ai awh te, YMA Sub-Headquarters Lunglei hruaitute leh District MJA member-te an tel.

Family Pension Voluntary Surrender chungchang zir honaa tar lan a nih danin, tun dinhmunah Lunglei District Treasury Office hnuaiah pensioner 4,228 awm mekin, thla khata hlawh an lak zat belh khawm chu cheng nuai 1,340 chuang a ni a. Family pension la mi 1,815 awmin, family pension-a thla khata pek chhuah zat chu cheng nuai 442 chuang a ni a. July ni 1, 2026-a PPO surrender-na hun hawn aṭangin tun thlengin chhan hrang hrang pali avangin family pension surrender mi pariat awm tawhin, he'ng mi pariat te'n thla khata hlawh an lak belh khawm chu ₹1,47,674/- a ni.

Mizoram sawrkar chuan danin a phal loh leh document dik lo hmanga family pension late tan July 1, 2026 aṭanga September 30, 2026 chhungin mahni duh thu ngeia pek kir theihna hun a hawng a. Hemi hun chhunga surrender lote chu an chungah dan angin hma lak a ni ang.