1861/2026-2027

Dated Aizawl, the 19th August 2026: Vawiin khan Pu Lalduhoma, Chief Minister hovin a pisaah Mizoram Liquor (Prohibition) Amendment Act, 2025 hnuaia Local Fruit Beer manufacturer leh Winery licence pekchhuah tur thlangtu tura din Selection Committee-te an thukhawm a, dilna 99 lut zingah Selection Committee-in a endik tawh mi/firm 11 pawm an ni. Meeting hi Excise & Narcotics Department Minister Pu Lalnghinglova Hmar chuan a telpui.

Chief Minister chuan, "Kan ngaih pawimawh hmasak ber chu kut hnathawktute an ni a, an thei leh thlai thar man man zawka an hralh theihna tur remchang kan siamsak dawn a, a lawmawm hle a. Tunlai thiamna hmanga sawngbawl a, mihring hriselna ngai pawimawh chunga food safety standard ang taka kalpui hi kan tihmakmawh a ni," a ti.

Selection Committee chuan powerpoint presentation hmangin local fruit beer leh wine siam thei tur an endik dan leh tehfung hrang hrang an hmante an sawifiah a. Tehfung zingah food safety guidelines an zawm thei em, a siamna hmanrua puitling an nei em, chung hmanruate tha taka hmang a enkawl thei turin mihring leh sum an nei em, Mizorama thei leh thlai tharchhuah ngei hmang dawn se an tlin ang em tih te a tel.

Local fruit beer siam dil hi mi 96 leh Winery din dil mi pathum an awm a. Selection Committee chuan diltute tan interview a buatsaih bakah a a theih ang angin a hmunhma an endik a. Endikna behchhana Selection Committee in rawtna a siam atangin vawiina meeting chuan local fruit beer siam dilna 11 a pawm a, dilna dang 13 te chu hun pek belh a, endik leh phawt nise, an ti.

An hmalak lehzel dan tur leh an mamawhte an sawi nghal a. Selection process zawhah thlanchhuahte chu training neih pui a, kuthnathawktute nena inzawmna thuk zawk siamsak a, intlawhpawhtawnna (Inter-visit) an neih theih dan turte pawh an sawi a. Licence hmututen an zawm tur Standard Operating Procedure (SOP) mumal tak duan ni se an tih bakah application thehlut duhte tan hun hawn belh an rel bawk.

Selection Committee-ah hian Commerce & Industries, Excise and Narcotics Department, Horticulture Department, Food & Drugs Administration aiawhte bakah Mizoram University leh mimal he mi kawnga thiamna bîk neite an tel a, Handholding CEO a tel bawk.