4654/2025-2026

Lunglei, 2026 Ramtuk thla ni 28: Vawiin khan Lunglei High Powered Committee (HPC) Vice Chairman, Lunglei North bialtu MLA Pu V. Malsawmtluanga chuan Mizo Upa Pawl (MUP) Zotlang Unit (Lunglei) Golden Jubilee lawmna chu Khuallian niin a hmanpui.

Pu R. Lalthangvunga Ina Golden Jubilee lawmna hun hmanah hian Khuallian Pu V. Malsawmtluanga chuan MUP member-te Golden Jubilee chibai bukin, duhsakna a hlan a. Upate zahnaah malsawmna a awm tih sawiin, nu leh pa leh aia upate zahna kawngah ṭhangtharte'n ṭan lak a ngai tih a sawi a. Upate chu chak tawh lo leh kohhran leh khawtlangah pawh ṭangkai tawh lo anga inngai lo tura chahin, tu leh fate leh ram leh hnam tana an hlutna te, an ṭawngṭaina leh thurawnin malsawmna a ken telte hre reng turin a chah a. MLA a nihna zawnah upate tana a tih theih hrang hrangah tlanchhiat a tum loh thu leh an tana din zel a tum thu sawiin, MUP te'n pawl leh member-te tana an mamawhte inthlahrung lova a hnena thlen ṭhin turin a chah a. Upate malsawmna leh ṭawngṭaipuina chu thil thlakhlelhawm leh hlu tak nia a hriat thu sawiin, ram rawngbawl hna ṭha taka a thawh theih nana ṭawngṭaipui zel turin a ngen.

Pu V. Malsawmtluanga chuan Mizoram sawrkarin upate a ngaih pawimawh thu sawiin, upate chhawmdawlna (old age pension) a tihpun bakah, sawrkar laipui aṭanga sum kal a muan ṭhin avangin State sawrkarin lo pek lailawk tur State sum dah turin ruahmanna a siam tih a sawi a. Sawrkarin Zotlang ram chhung Zapui ramah Mizorama Solar Power Plant lian ber tur bun a tum thu sawiin, hei hi a taka kalpui theih a nih chuan Mizoram tana Zotlang khawtlangin a thawh ropui tak leh khawtlang hmasawnna tur a ni dawn tih a sawi a. Khawtlang mipuite thawhpuina leh ṭawiawmna a ngen.

Pu V. Malsawmtluanga hian MUP Zotlang Unit dintu la dam mi 4-te — Pu C. Kapṭhuama (kum 94), Pu JT Kima (kum 92), Pu R. Sumkhuma (kum 88) leh Pu S. Kapkima (kum 87) te chu ngaihhlutna thilpek ₹1,000/- ṭheuh a hlan a. MUP Zotlang Unit te'n Mizoram hmun pawimawh tlawhna tur an dil angin kum thara MLA Fund hmuh hmasak ber aṭangin ruahmanna siam a nih tur thu a sawi.

MUP Zotlang Unit Golden Jubilee lawmnaah hian Lunglei Municipal Council (LMC) Executive Councillor Pi Lalhruaitluangi Sailo chu Khual Zahawm niin, Khual Zahawm hian MUP Ina Golden Jubilee hriat rengna lungphum (monument) chu a hawng thung.

MUP Zotlang Unit Golden Jubilee lawmna hi President Pu R. Lalthangvunga'n a kaihruai a. Kum 2025 January – 2026 February inkara Unit member chatuan ram pan mi 16 te sunna hun hman a ni a. Rev. B. Lalrinawma'n hunserh hmangin, Secretary Pu Zairemthanga Sailo chuan a din tirh aṭanga tun thlenga MUP Zotlang Unit dinhmun tlangpui a tar lang a. Pu Lalchhuanawma Colney chuan hnah tuma kal khawmte awiin, MUP hmingin Unit MUP member nupa tuak 9 hnenah Inneih Golden Jubilee lawmpuina leh nupa tuak 5 hnenah Inneih Silver Jubilee lawmpuina thuziak hlan a ni a. Golden Jubilee pual pawhfuh lawmman sem a ni bawk.

Chawhnu lamah Golden Jubilee lawmna hun hman chhunzawm niin, Khual Zahawm Pi Lalhruaitluangi Sailo chuan thu a sawi bakah, MUP General Headquarters Lunglei hruaitute, Zotlang Local Council, Branch MHIP leh Branch YMA ai awhte'n thu an sawi bawk a. Deborah Ralte chuan zaia kal khawmte awiin, intihhlimna leh infiamna hrang hrang buatsaih a ni a. Assistant Secretary Pu R. Lalduha chuan lawm thu sawiin, tlai lamah Golden Jubilee lawmna chawhlui an kil ho nghal.

Mizo Upa Pawl Zotlang Unit hi March ni 1, 1976 khan din niin, tunah hian member 216 an awm mek a. MUP Zotlang Unit hian kum tin an din champha phak hi ruai nen an lawm ṭhin a. Kumin hian an din ni, March ni 1 chu Pathianni a nih avangin Golden Jubilee hi vawiin khan an lawm a ni.

MUP Zotlang Unit hian an pawl hmingin in (building) ṭha tak mai neiin, tunah hian chhungkaw pakhatin an luah mek a. Member thi an awmin Headquarters tuarpuina lehkha bakah, Unit suma citation siamin, pawisa fai ₹3,000/- nen member thite an inral ṭhin a. Khawtlang thil pawimawh an telna awmah pawl hmingin ṭhahnem ngai takin an thawk chhuak ṭhin bawk.