4655/2025-2026

Lunglei, 2026 Ramtuk thla ni 28: Lunglei District Agricultural Technology Management Agency (ATMA) huaihawta Lunglei Agriculture Complex-a ni hnih awh Kut Hna Thawktute Kutpui, "Kisan Mela" buatsaih kharna hun chu vawiin chawhnu khan Lunglei West bialtu MLA Pu T. Lalhlimpuia'n a hmanpui.

Khuallian Pu T. Lalhlimpuia chuan thlawhhma siam leh a kaihhnawihah Lunglei District-in hmasawn theihna (potential) tam tak a nei tih sawiin, chumi chu hmang ṭangkaia sawr chhuak thei turin kut hna thawktute'n kawhhmuh leh kaihhruai an mamawh tih a sawi a. Mizoram sawrkarin Chief Minister kaihhruaina hnuaiah ram hmasawnna tur kalkawng duangin, mi taima tana hlawhtlinna tur a ruahman tih a sawi a. Kut hna thawktute tihhmasawn leh an thar chhuah hmanga ram hmasawnna thlentir chu sawrkarin a tum lian tak a nih thu sawiin, kut hna thawktute chu party induhsakna beisei lo va, taimakna hmanga sawrkar ko eih thei tura hma la turin a chah a. Ram dang nena insumdawn tawnna kawng inhawng turah chhiatpui lova chhawrtu ni turin thiam thil zir leh theihna tihpun zel a pawimawh thu te, intodelh tur leh thawn chhuah tham thar chhuah nei tura hma lak a pawimawh thu te a sawi.

Pu T. Lalhlimpuia chuan Kisan Mela chu thlai thar pho chhuahna chauh ni lovin, huan enkawl dan leh hna thawh dan hriatna tura inkaihhruaina hun ṭha tak a nih thu sawiin, kut hna thawha hmasawn turin ruahmanna fel tak nena hma lak leh tun lai thiamna thar hman ṭangkai thiam a pawimawh thu a sawi a. Thlawhhma aṭanga thar chhuah leh lak luh tipung tur te, a enkawl leh hralhna kawnga awmze nei zawka hma la tur te'n a zau zauva hma lak leh intel khawm thiam a pawimawh thu sawiin, khaw hrang hrangte'n mahni khaw hming chherna tur hma lakna liantham nei zel se ṭha a tih thu a sawi a. Sawrkar department-te leh kut hna thawktute chu Kisan Mela kal tlanga ngaihtuahna thar pu tura chahin, mi thiamte rawn chunga hma la zel turin kut hna thawktute chu a chah.

Lunglei District Agriculture Officer & ATMA Project Director Dr Samuel Lalliansanga chuan Kisan Mela buatsaih chhan sawi fiahin, a hlawhtlin nana tha thawhtu sawrkar hotute, department hrang hrang, kut hna thawktute leh a chhimtu mipuite chungah lawm thu a sawi a. Lunglei District ATMA Deputy Project Director Pu John Laltluangliana chuan report a pe a. Line department aṭangin AH&Vety Joint Director Dr Ngurzidingi Sailo, District Sericulture Officer Pu ZD Zoramthanga, District Horticulture Officer Pu Lalṭhakima, LRS&WC Range Officer Pu H. Lalremruata, District Fisheries Development Officer Pi Christina Lalramchhani leh kut hna thawktu ai awh aṭangin thu sawi ngaihthlak a ni bawk a. Lunglei Assistant District Agriculture Officer Pu K. Lalrinfela'n lawm thu sawiin hun a khar.

ATMA Kisan Mela-ah hian thlai leh thil dang pho chhuahteah intihsiakna siam lovin, department hrang hrang hnuaia kut hna thawktu ṭha thlan chhuahte hnenah "Best Farmer Award" hlan a ni a. Lawmman tur sum hi MLA Pu T. Lalhlimpuia chuan tumin, farmer 12 hnenah farmer pakhat zelah ₹5,000/- leh certificate hlan a ni.

Best Farmer Award dawngtute chu:

(1) Agriculture & Farmers Welfare Department — Pu Rinthanga, Khawmawi (Oil Palm); Pu R. Zoramthanga, Haulawng (Buh) leh Pu Kaphmingthanga, Buarpui (Fu)

(2) Horticulture Department — Pu Lalremsiama, Zawlpui (Nul siam) leh Pu L. Lalrinmawia, Ramthar, Lunglei (Dragon fruit)

(3) Animal Husbandry & Veterinary Department — Pu Pc. Zonunsanga, Zobawk (Bawng vulh) leh Pu C. Lalnghakliana, Venghlun (Vawk vulh)

(4) Land Resources, Soil & Water Conservation Department — Pu P. Lalthansanga, Haulawng (Rubber) leh Pu Lalremruata, Haulawng (Rubber)

(5) Sericulture Department — Pu Lalzarzova, Ṭawipui North-II (Eri pangang khawi) leh Pu Lalduhzuala, Haulawng (Muga pangang khawi)

(6) Fisheries Department — Pu Lalhmunmawia Sailo, Serte (Sangha dil)

February ni 27–28, 2026 chhunga Lunglei District Kisan Mela kalpuiah hian stall 21 awmin, Agriculture, ATMA, Horticulture, AH & Veterinary, Fisheries, Soil & Water Conservation, Sericulture, KVK Lunglei, ICAR, MzSRLM, NEIDA, SELCO Foundation, FSSAI, Jute Corporation of India, Cadbury leh tualchhung mi kut hna thawktu, thil siam chhuaktu leh lo neihna hmanraw zuartute an inpho chhuak a. He Kisan Mela-ah hian kut hna thawktute thil deh chhuah hrang hrang man man zawka lei theiha chhawp chhuah niin, AH & Veterinary Department leh KVK te'n ran leh thlai hriselna dinhmun endikna (Animal & Plant Health Clinic) an buatsaih nghal bawk.

Lunglei District Kisan Mela hi mipuite'n an hlut hle a, ni khatah mi 6,000–7,000 velin an tlawh anga chhinchhiah a ni a. Thlai leh thil thar chhuah hrang hrangte a man tlawma zawrh niin, hemi atan hian kut hna thawktute hnenah support price pek a ni a. Department leh an hnuaia kut hna thawktute stall hawnga an inpho chhuah bakah, thlawhhma enkawl kawnga hriat tur pawimawh hrang hrang (information booklet) siam leh sem a ni bawk a. Animal Health Clinic-ah ran entir 250 vel awmin, ui a hri danna (Anti-Rabies Vaccine) 80 chuang pek a nih bakah, damdawi chi hrang hrang sem a ni a. Stall hrang hranga thlai leh thil pho chhuahte pawh hralh a kal hle bawk a. Kisan Mela puala Farmer–Scientist Interaction Programme buatsaihah mi thiamte'n kut hna thawktute hriat tur pawimawh hrang hrang zirtirin, kut hna thawktute nen an inkawm ho bawk.