4656/2025-2026

Lunglei, 2026 Ramtuk thla ni 28: Vawiin February ni 28, 2026 khan India ram hmun dang rualin Lunglei District-ah pawh chhul hmawr cancer thlentu Human Papillomavirus (HPV) laka invenna tur vaccine pek runpui chu kalpui ṭan a ni.

Prime Minister Pu Narendra Modi chuan chawhma dar 11:30-ah HPV vaccine chu hmeichhe tleirawl kum 14 tling tawh, kum 15 la pumhlum lote tan sawrkar damdawi in hrang hranga a thlawna lak theih turin India ram pum huapin Ajmer, Rajasthan aṭangin a tlangzarh a. Mizoramah chuan Health & Family Welfare Minister Pi Lalrinpuii chuan chawhma dar 11:45-ah Civil Hospital Auditorium-ah tlangzarhin, Lunglei District tana HPV vaccine pek runpui hawnna chu Sub-Divisional Officer (Sadar) Pi TT Beikhaizi hovin chhun dar 12:00-ah Urban Primary Health Centre (UPHC), Sazaikawn, Lungleiah buatsaih a ni.

Pi TT Beikhaizi chuan tihdam aiin inven a ṭha zawk tih hriaa HPV vaccine la thei zawng zawngin lak tum vek turin a chah a. Sawrkarin mipui hriselna atana sum leh tha tam tak senga hma lakna a kalpui chu mipuite'n hlut thiam a, chhawr ṭangkai a pawimawh thu sawiin, thawktute pawh kim taka vaccine pe thei tura theih tawp chhuah turin a chah a. Hmeichhia kum 30–65 inkar HPV vaccine la lote tan pawh mahni dinhmun hre chiang tura hunbi neia inentir ṭhin a ṭhat thu sawiin, hriselna ngai pawimawh turin kal khawmte a chah.

UPHC Sazaikawna hun hman hi Lunglei District Immunisation Officer Dr Christina Zonunmawii'n kaihruaiin, HPV vaccine pek runpui kalpui dan tur tlangpui a sawi fiah a. Lunglei District Senior Chief Medical Officer Dr Lalrinthangi chuan lawm thu sawiin, chawhnu dar 1:00 aṭangin HPV vaccine hi pek ṭan a ni a. Lunglei District-ah chuan Sub-Divisional Hospital 1 (Tlabung), UPHC 2 (Sazaikawn leh Hrangchalkawn) leh PHC 5 (Buarpui, Bunghmun, Haulawng, Lungsen leh Ṭawipui South)-ah te HPV Vaccine hi pek a ni.

HPV Vaccine pek runpui hi thla thum chhung kalpui tur niin, hmeichhe tleirawl kum 14 pumhlum tawh, kum 15 la tling lote hnenah ni tin damdawi in (health facilities) hrang hrang — PHC, UPHC, SDH leh DH-ah te pek ṭhin a ni dawn a. Lunglei District-ah chuan HPV Vaccine pek tur tinzawn (target) tleirawl 1,385 an awm.

Tun dinhmuna HPV Vaccine hman mek hi GARDASIL niin, HPV Strain pali — 6, 11, 16 leh 18 te laka venna a ni a, vawi khat chiu (single dose) zela pek tur a ni.

Chhul hmawr cancer endikna (screening) hi Health & Wellness Centre leh a chung lam damdawi inahte a thlawna kalpui mek a ni bawk.

Chhul hmawr cancer hi India rama hmeichhe cancer hluar ber dawttu niin, kum tin mi 1,20,000 (nuai khat sing hnih) velin vei thar leh mi 80,000 (sing riat) velin thihpui anga chhut a ni a. Hemi ven nan hian HPV Vaccination Programme hnuaiah hian India ram pumah kum tin hmeichhe tleirawl kum 14 mi vaibelchhe 1.15 chu HPV Vaccine hi pe turin ruahman a ni.