3416/2024-2025

2024 Pawltlak thla ni 6: Zanin khan Lunglei High Powered Committee (HPC) Vice Chairman Pu V. Malsawmtluanga MLA chuan Vulmawi Award 2024 semna hun Saikuti Hall, Lungleia buatsaih chu Khuallian niin a hmanpui.

Pu V. Malsawmtluanga chuan Vulmawi Award-ah a tir aṭangin Lunglei HPC chu main sponsor a ni ṭhin tih sawiin, HPC chuan Vulmawi Award chu a ngaihluin, kal zel turin duhsakna a hlan tih a sawi a. Vulmawi Award chu Mizoram pum huap award hlu tak, mi tam tak fuih phura chona petu, an theihna sawr chhuak tura nawr kaltu a ni tiin, huang hrang hrangah mi tam tak fuih phurtu a la nih zel a beisei thu a sawi a. Mizoram sawrkarin ṭhalai talent nei, thil ti tak tak mi, mi taimate a ngai pawimawh a, kut hna thawh, infiamna, rimawi leh mahni thiam thil leh tui zawng hmanga eizawnna ngelnghet an neih theih nan Handholding Scheme a ruahman tih sawiin, a tam thei ang berin chhawr tura ngaihven turin a fuih a. Kumina Vulmawi Award dawngtu zawng zawngte a lawmpui thu sawiin, mi dangte tana malsawmna leh puihna pe chhuak zel turin duhsakna a hlan a ni.

Vulmawi Award 2024 semna hun hi Lunglei South bialtu MLA Pu Lalramliana Papuia leh Lunglei Municipal Council (LMC) Chairman Pu Lalzuithanga te pawhin an hmanpui a. Award Committee Vice Chairman Pu Lalduhawma Hnamte chuan hun kaihruaiin BCM Chanmari Pastor Bial Pro Pastor David C. Lalnunkima'n hunserh a hmang a. Lunglei South Branch BSI Choir te'n hawnna hla sain, Chief Organiser Pu K. Lalrinpuia'n thu a sawi a. Award Committee Secretary Pu Lalrinmawia Punte hnen aṭangin report ngaihthlak niin, category 26-ah award sem a nih bakah, zaithiam hrang hrang zaiin, concert hun hman chhunzawm a ni.

Tun ṭum hi Vulmawi Award sem vawi 9-na niin, Lunglei High Powered Committee chu main sponsor an ni a. Vulmawi Award hi kum 2007-ah Lunglei District huapa sem ṭan niin, kum 2008-ah Lunglei District huap thova sem chhunzawm a ni a. Kum 2010 aṭangin kum khat danah Mizoram huapa sem ṭan niin, Covid laiin ṭum khat chawlh a ni a. Kum 2022 aṭang khan sem chhunzawm leh a ni.

Kum danga category 22-a sem ni ṭhin chu kuminah category pali siam belh niin, category 26-ah Award sem a ni a. Kumin hian hmeichhia 6 leh mipa 13-in Award hi dawngin, mimal ni lo 7-in an dawng bawk a. He'ng zinga pathum hi Organising Committee thlan niin, a dang zawng chu mipui thlan a ni a. Category hrang hranga vote tla belh khawm chu 5,53,230 niin, kum 2022 aiin vote a tla ṭha a ni.

Vulmawi Award ṭum kua sem tawhah C. Lalzarmawia'n Award dawng tam berin, pariat a dawng tawh a. Award a dawnna hi 'Musician of the Year', 'Song Composer of the Year' leh 'Song of the Year'-ahte a ni.

Vulmawi Award 2024-ah hian Jonathan Lianhna chuan Award pathum lain, a la tam ber a. A Award lakte chu: 'Best Male Artist (Gospel)', 'Best Song Composer (Gospel)' leh 'Best Music Video (Gospel) - "Beiseina" (Jonathan, Zorema, Uncle Joe)' te a ni a. HOM-in Award pahnih - 'Best Male Artist (Lengzem/Lenglawng)' leh 'Song of the Year (Lengzem/Lenglawng)' lain, Youngfella pawhin Award pahnih - 'Best Song Composer (Lengzem/Lenglawng)' leh 'Best Rapper' a la bawk.

Vulmawi Award 2024 dawngtute chu he'ngte hi an ni:

1. Lifetime Achievement Award: Rev. Dr F. Sangvela