3417/2024-2025

Dated Aizawl, the 7th December, 2024: Vawiin khan Chief Minister Pu Lalduhoma chuan Centre for Environment & Social Justice (CESJ) te buatsaih, Assam Rifle ram chhunga thing chhiarpui leh zirchianna (Tree Inventory & Carbon Storage of Assam Rifle Campus, Aizawl, Mizoram) lehkhabu a tlangzarh.

Thu a sawinaah Chief Minister chuan, khawvelin sustainable development a ngai pawimawh tawh a, hmasawnna hna thawh te hi khuarei daih leh leilung tichhe lo thei ang ber an ni zel tawh. He kawng hi kan zawh ve a ngai tih kan hria a, theihtawp kan chhuah dawn a ni. Amaherawh chu hmasawnna kan duh a, hmasawnna hnate hian environment a nek bawk si avangin hmasawnna man pek hi a ngai ve tih kan hriat a tha. Kan kal dan tur tinrengah kan inrawnkhawm zel dawn nia, tiin a chah.

Assam Rifles sawn chhuah tur chungchanga hmalak mekte tarlangin, tunah hian a ram tehin joint survey kan nei mek a, ram hi khauh takin kan humhalh dawn a ni, a ti.

Pu Lalthansanga, Minister, EF& CC pawhin thusawina hun a hmang bawk.

A zirchiangtute hi PC Zothanpuii leh Michael Lalramdingliana, Research Scholar, Deptt of Forestry, MZU an ni a. Editor hi Dr. Vanramliana a ni. PC Zothanpuii hian an zir chian dan report a pe a. AR ram 16.9 Ha a zaua mi an zir a, thing chi hrang chi 480 an awm a, species hrang 80, family 31 leh genera 59 an chhinchhiah a ni. International Union for Conservation of Nature te tehfung atanga tehin riral hlauhawm tak venhim ngai bik thing (critically endangered) chi 4 an awm a, an riral hlauhthawnawm (endangered) 1 leh dinhmun ngaihtuahawm (vulnarable) 5 an awm. An zinga 71 hi ramhmul damdawia hman theih leh ei theih chite an ni. He hmun hian carbon dioxide (CO2e) 5766.73 bawr vel a hip lut tih hmuhchhuah a ni.

Assam Rifles chhuah lam pang ram, vawiina ramngaw tha taka lo chang ta hi Bethlehem Branch YMA ten kum 2008 atanga "Aizawl Chuap" hming phuaha hma an lo lakna rah chhuak a ni a. Tunhmaa Bawngpu par an tih, thenkhatten Vaivakawn an tih bawk hmun zau tak kha tunah hian ramngaw tha tak a lo chang tawh a ni.

CESJ Working Chairman Pi Vanramchhuangi pawhin thusawiin, CESJ ngaihdanah chuan environment humhalh hi hmasa ber se. Hmasawnna hi environment tichhe lo thei ang berin; environment humhimna dan te zawm tlat chungin thawk ila kan duh a ni, a ti.

Lehkhabu tlangzarh inkhawm hi Pi Saizampuii Sailo, Treasurer, CESJ in a kaihruai a, Rev. LH Rawse chuan hunserh a hmang a ni.