3418/2024-2025

2024 Pawltlak thla ni 7: Nimin khan District Hub for Empowerment of Women, District Programme Officer Office, Women & Child Development Department bul tumin YMA Sub-Headquarters Conference Hall, Lungleiah hmeichhiate chunga hleilenna thleng ṭhin tibo tura ni 16 chhunga beihpui thlak, "16 Days Campaign on Elimination of Gender Based Violence" kharna hun leh hemi puala poster making competition lawmman semna hun hman a ni a. Lunglei Sub-Divisional Officer (Sadar) Pi TT Beikhaizi chuan Khuallian niin hun a hmanpui.

Pi TT Beikhaizi chuan hmeichhe chunga hleilenna tihah hian kut thlak ringawt ni lovin, an khawsak leh an nun tinuam lo thei khawpa rilru naa siam te hi a tel thei vek tih sawiin, chu chuan inkiltawihna leh mahni nunna lak duhna hial te a thlen theih avangin fimkhur a ṭul tih a sawi a. Hmeichhiate'n mahni dikna chanvo hriat thar ṭul a tih thu te, hleilenna a lo thlenin dan anga rorel a nih theih nan thuneitute hnena thlen vat ṭhin a pawimawh thu te, chhungkua leh kohhranah hmeichhiate venhimna lam inzirtir uar zel a ṭul thu leh hmeichhiate pawhin mipate zah thiam zir a ngaih thu te a sawi a ni.

He hun hi Lunglei ICDS Project-a Child Development Project Officer Pi R. Lalhmingliani chuan a kaihruai a. Elimination of Gender Based Violence campaign hman a nih chhan leh hemi puala activity hrang hrang buatsaih dan a sawi fiah a. Poster making competition lawmman dawngtute hnenah Khuallian Pi TT Beikhaizi chuan lawmman a hlan a ni.

Lawmman dawngtute chu:-

1. Pc. Lalruatdika, I&PR Department (₹ 7,000/-)   

2. Lalthianghlima, WCD Department (₹ 5,000/-)

3. One Stop Centre (₹ 3,000/-)

He hun hmanah hian DPO, DCPU, OSC leh Shakti Sadan staff-te leh anganwadi worker-te an tel a. DHEW Lungleia Gender Specialist Pi R. Lalhmangaihkimi chuan gender based violence chungchang zirtirin, District Mission Coordinator Pi K. Lalrinawmi chuan lawm thu sawiin hun a khar a ni.