2896/2024-2025

2024 Sahmulphah thla ni 7: Young Mizo Association (YMA) Ṭawipui Group te buatsaih Volleyball Tournament hmawr bawkna hun Ṭawipui North-II muala hman chu vawiin khan Lunglei High Powered Committee (HPC) Vice Chairman Pu V. Malsawmtluanga MLA chuan Khuallian niin a hmanpui.

Khuallian Pu V. Malsawmtluanga chuan ṭhalaite tana nun kaihruaitu leh nun kawng dik zawhna atana pawimawh tak pakhat chu infiamna discipline chi hrang hrang hi a ni tiin, YMA Ṭawipui Group-in ṭhalai puala infiamna volleyball tournament (mipa leh hmeichhia) an buatsaih chu lawmawm a tih thu leh hruaitute fakawm a tih thu a sawi a. Hlawhtlinna chang turin rinawmna leh taimakna a pawimawh tih sawiin, ṭhalai rinawm leh taima, ruihhlo leh a kaihhnawiha insum thei leh fihlim nih tum tlat turin YMA member kal khawmte chu a fuih a. YMA Ṭawipui Group te'n a ṭul anga an hman atan pawisa fai ₹ 30,000/- a hlan nghal a ni.

Ṭawipui Group YMA volleyball tournament hmawr bawknaah hian Lunglei Sub-Headquarters YMA Vice President Pu CMS Dawngliana chu khual zahawm a ni a. Ram leh hnam humhalhna hmanraw ṭangkai leh pawimawh tak pakhat chu taksa sawizawina leh infiamna a nih thu sawiin, ram humhalh nan ruihhlo laka inthiar fihlim tur leh intodelh thei tura mamawh titlem turin ṭhalaite chu a fuih a ni.

Ṭawipui Group YMA Inter-Branch Volleyball Tournament hi November ni 5 - 7, 2024 chhungin Ṭawipui North-II khelmualah khelh niin, a hawnnaah hian Lunglei Sub-Headquarters YMA Secretary Pu Zothanzuala Hnamte chu Khuallian a ni a. He tournament-ah hian Ṭawipui Group YMA huam chhunga branch hrang hrang aṭangin mipa team 10 leh hmeichhe team 2 an tel a. Mipa final-ah Mualcheng 'S' Branch chuan Thingfal Branch hnehin, an champion a. Hmeichhiaah Ṭawipui North-II Branch-in Ṭhualṭhu Branch hnehin an champion thung.

Attachment

  • Loading attachment...