2896/2024-2025

2024 Sahmulphah thla ni 7: Lunglei South bialtu MLA Pu Lalramliana Papuia chuan vawiin khan a bial chhung, Vaisam khuaa MLA Fund hmanga volleyball court siam thar a hawng.

MLA Pu Lalramliana Papuia chuan Vaisamah MLA Fund aṭanga ṭhalai infiam mite hmasawnna atana ruhrel pawimawh, volleyball court ruahman a hlawhtling chu lawmawm a tih thu sawiin, fund awm chhun ang ang awmze nei leh chhenfakawm taka hman a ni chu a lawmna tizualtu a nih thu a sawi a. Khawtlangin neitu rilru pua sum awm ang ṭha taka hmang a, an tihpuitlin avanga lawmawm a tih thu sawiin, khawtlang hruaitute nen khawtlang hmasawnna tur ruahmanna hrang hrang siama thuneitu sang lamah an thlen reng thu a sawi a. Khawtlanga hmasawnna hai lut tura hma laknaah kalphung dik leh felfai tak hnuaiah eng kim kalpui a pawimawh tih sawiin, ram leh khawtlangah a langa hmasawnna ringawt ni lo, rilru lama hmasawnna leh rilru dik put inzirtir a pawimawh thu a sawi a. Khawtlang hruaitute leh mipuite chu chhungkaw bil leh mimal hlawkna ni lova khawtlang tana ṭha tur leh chhenfakawm tur ngaihtuahna seng tlang turin a chah a ni.

Volleyball court thar hawnna hun hi Vaisam Branch YMA President Pu Vandailova'n kaihruaiin, Upa H. Lalenga'n hunserh a hmang a. Branch YMA Secretary Pu Pc. Rohmingliana'n report pein, volleyball court thar lawm nan one day tournament khelh zui nghal a ni.

Vaisam volleyball court hi MLA Fund cheng nuai hnih senga siam niin, a chhuat chin concrete-a siam a nih bakah, rawng hnawih, line rin, len (net) leh a zarna ban phun te a tel bawk a. Volleyball court zau zawng hi a dung metre 18 leh a vang metre 9 a ni.

MLA Pu Lalramliana Papuia hian Vaisam khuaa kum upa, MUP member-te tan an intihhlimna turin ama sumin carrom board ngaihtuahsakin, vawiin hian a hlan nghal a. Vaisam RMSA school tlawh bawkin, an harsatna leh mamawhte a enpui a. Chithar khuaah khawtlang hruaitute leh mipuite nen inkawmhona hun an hmang zui bawk.

Attachment

  • Loading attachment...