2103/2024-2025

2024 Mimkut thla ni 17: September ni 16, 2024 (Thawhṭanni) zan khan Lunglei High Powered Committee Vice Chairman, Lunglei North bialtu MLA Pu V. Malsawmtluanga chuan Lunglei Zohnuai Branch YMA Golden Jubilee lawmna chu Khuallian niin a hmanpui.

Pu V. Malsawmtluanga chuan Zohnuai Branch YMA-in kum 50 a tling ta chu a lawmpui thu a sawi a. YMA dinnaa sul sutu leh hruaitu hmasate, YMA tung ding tlattute zahna chibai bukin, an inpekna leh ṭhahnem ngaihna avangin Branch YMA chuan golden jubilee chu thleng thei a ni, a ti a. YMA chu Mizorama tlawmngai pawl lian ber a nih angin mi rethei chhumchhiate, mi harsa zawkte ṭanpuitu pawl pawimawh tak a nih thu sawiin, hmangaihna leh inremna nena hma lam pan zel turin Branch YMA member-te chu a fuih a ni.

Pu V. Malsawmtluanga chuan Mizoram Sawrkarin Bana Kaih (Handholding) Policy chu tun karah a tlangzarh tawh mai dawn tih sawiin, Zohnuai ṭhalai tam zawk chu he sawrkar ruahmanna hmang hian dinhmun sang zawk chuangkai turin a duhsak thu a sawi a. Mizoram mai ni lo, India ram khawvela Mizote tihmingṭhatu Lallianzuala Chhangte chawr chhuahna khua a nih angin Zohnuai ṭhalaite chuan theihna an nei tih leh ram leh hnam tan mawhphurhna an nei tih hria a, mahni intodelh leh mahni kea din tum tlat turin a fuih a ni.

Zohnuai Branch YMA golden jubilee lawmna hun hi Zohnuai Mualah buatsaih niin, Pu Lalnunthara Chhangte leh Nl. Laldingngheti Pautu te'n an kaihruai a. Branch YMA Adviser Pu R. Lalduhawma'n hunserh hmangin, President Pu C. Lalthanpuia'n chibai bukna thu a sawi a. Jubilee Celebration Committee Secretary Tv. PT Lallawmsanga'n report pein, Lunglei Municipal Council (LMC) Ward II Councillor Pi Lalmuanpuii Renthlei, Lunglei Sub-Headquarters YMA President Pu K. Lalfakzuala leh Branch YMA Founder Secretary Pu R. Lalsangvunga te'n thu an sawi a. Zohnuai Local Council Chairman Pu PC Vanlalhruaia'n souvenir tlangzarhin, hruaitu hlui mi 55 te chawimawina hun hman a ni a. Sports lawmman sem a nih bakah, MUP Zohnuai Unit, MHIP Zohnuai Branch leh Section YMA te'n chanvo hrang hrang neiin, YMA Sub-Hqrs Lunglei zaipawl leh zaithiam hrang hrang an zai a. Jubilee concert buatsaih zui a ni bawk.

YMA Zohnuai Branch hi September ni 16, 1974  khan member 50 vel kal khawmin an din a. Tun dinhmunah YMA member 1,709 awm mekin, section hrang hrang pangaah an inṭhen a. Branch President hmasa ber chu Pu K. Pamanga niin, Pu K. Pamanga hian nimin tuk khan jubilee lungphun a hawng a. Golden jubilee lawmna atan hian Golden Jubilee Celebration Committee te'n ruahmanna siamin, marathon race, volleyball, football, badminton, insuknawr, insaihruipawh, inbuan, inkawikah, adt. hmangin kar thum chhung vel section hrang hrang inelna buatsaih a ni bawk.