2102/2024-2025

2024 Mimkut thla ni 17: Vawiin khan Lunglei District Bawrhsap Pu R. Lalṭhazuala hovin a office chamber-ah Lunglei District chhunga naupang enkawlna hmun (child care institute) hrang hranga enkawl mek naupangte dinhmun leh sawrkar dan anga fahrah leh ngaihsaktu nei lo naupangte faa lak kalpui dan thlir ho a ni.

He hunah hian DC office, District Child Protection Unit (DCPU) leh I&PR official-te bakah, Child Welfare Committee (CWC) Chairman leh Lungleia naupang enkawlna hmun pali - Baptist Child Resources Centre (Specialised Adoption Agency) (BCRC), Baptist Church Orphanage (BCO), Kawlkhuma Boys Home leh Bethel Centre ai awhte an tel a. Additional Deputy Commissioner Pu James Miahlung leh DCPO Pi Lalrinkimi Hmar te chuan fahrah leh chhungkaw harsatna avanga chhungte'n an enkawl theih loh naupangte enkawlna chungchanga district level committee hma lakna tar langin, home/centre hrang hrangte'n an dinhmun report an pe a. Supreme Court-in naupang kum 18 hnuai lam dan anga faa lak theih a tih chin tehkhawng hrang hrang a siamte tar lan niin, Lunglei home/centre hrang hranga naupang awmte an hmakhua atana ṭha ber tura enkawl zui emaw, kum 18 an tlin hmaa awm lailawkna tur chhungkua (foster family) zawnsak emaw, faa laktir (adoption) emaw kalpui dan tura thil pawimawhte sawi ho a ni.

India ramah fahrah naupang, ngaihsaktu leh enkawltu nei lote'n anmahni ngaihsaktu leh enkawltu chhungkua an neih a, chhungkaw pangngai taka an sei len theih nan dan anga faa inlak theih dan siam niin, OAS an tih mai - fahrah (orphan), thlahthlam (abandoned) leh tlawmsan (surrendered) te chu dan anga faa lak theih [Legally Free for Adoption (LFA)]-a chhiar an ni ṭhin a. Tun hnaiah Supreme Court chuan LFA huangah hian OAS bakah naupang enkawlna hmuna awm naupangte an chhungte'n kum khat aia rei an ngaihven zui loh (children having no visitation) leh naupang enkawl tlak lo chhungte nei (children having unfit guardian) te chu dah belh an ni a. Lungleia home hrang hrangte report aṭangin tun dinhmunah chuan chhungte'n an ngaihven zui loh leh ngaihsaktu mumal nei lo tawp chu an awm rih lo nia hriat a ni.

Lunglei District-ah hian naupang enkawltu nei lote dan anga faa lak an nih theih nana buaipuitu specialised child adoption agency pakhat - Baptist Child Resources Centre (BCRC) a awm a. BCRC kal tlang hian kum 2017 - 2024 inkar chhungin Lungleia home hrang hranga naupang 11 chu dan anga faa lak ni tawhin, ram chhungah 5 (hmeichhia 1 & mipa 4) leh ram pawnah 6 (hmeichhia 2 & mipa 4) lak an ni.

Tun dinhmunah Lungleia naupang enkawlna hmun paliah te hian naupang 114 (BCRC-ah 2, BCO-ah 26, KK Boys Home-ah 16 leh Bethel Centre-ah 70) enkawl mek an ni.