630/2022-2023
Aizawl the 25th May, 2022 : HPC Lunglei kaltlanga hmalakna, ruahtui dah khawl leh tuikhur siam that project ‘HPC WATER STORAGE PILOT PROJECT’ pualin vawiin khan Lunglei High Powered Committee Conference Hall, Chanmari-ah hun hman a ni.

He Project hi HPC Lunglei District Annual Plan 2021-22 hnuaia cheng nuai 100 senga PHED LWSM kaltlanga hmalak niin Lunglei khawpui chhung hmun parukah (6) ruahtui dah khawlna (Demountable Tanky for rainwater harvesting) leh kangmei chhuah thulha hman tur tui dah khawlna pahnih (2) ruahman a nih bakah, tuikhur pariat (8) chei that a ni.

Lunglei HPC Vice Chairman Pu Lawmawma Tochhawng chuan heng ruhrel ruahman thar enkawl tu tur Veng VC leh YMA-te hnenah vawiin khan a hlan a ni.

Lunglei HPC Vice Chairman Pu Lawmawma Tochhawng chuan nikum April thlaa Lunglei District in kangmei nasa tak kan tawrh avang leh District ah tui kan harsat em avangin he project hi HPC chuan a ruahman thu sawiin District mipuiten an chhawr tangkai ngei a beisei thu a sawi a. Lunglei mipuite, a bik takin heng ruhrel awmna veng a chengte chu neitu rilru pu a uluk taka lo enkawl chhunzawm turin a chah a. Project ti hlawhtling tura thawktute, a bik takin PHE Department te chungah lawmthu a sawiin fur ruahtui khawl (rainwater harvesting) kawngah mahni zawn theuha theih anga hma la turin District mipuite a chah bawk a ni.

Pu Lalduhawma Chhakchhuak, SDO, PHED, LWSM chuan powerpoint hmangin hmalak dan tlangpui leh project thiltumte sawifiahna huna hmang a. Ruahtui dah khawlna Demountable Tanky for rainwater harvesting hi HSS Zobawk (40,000 litres) , Luangmual MPA area (20,000 litres), Govt P/S Venglai (20,000 litres), Lungpuizawl (40,000 litres), Serkawn Thlanmual (20,000 litres) leh Remand Home bul Ramthar (20,000 litres) ah dah niin kangmei chhuah thulha hman tur tui dah khawlna (Water Storage Tank for Emergency Response) hi Zotlang leh Chanmari ah dah a ni a. Hemi bakah hian Bazar Veng ah tuikhur pakhat leh Ramthar chhunga tuikhur pahnih chei that niin Pukpui, Lungmual, Theiriat, Zobawk N leh Zobawk S te chu an tuikhur chei that bakah a pump na leh dah khawlna hmanrua te ruahman sak an ni.