Nimin chawhnu dar 1:00 khan John Williams Hospital Lungleiah  Mit enna (Vision centre) chu  Synod Hospital Dutlang leh Mission for Vision, Mumbai tangkawp buatsaihin khuallian Dr. Lalremmawii, SPIO(NPCB&VI), Govt of Mizoram chuan a hawng. He hunah hian Lunglei DC Pi K.Lalrinzuali, SP Pu C. Lalthanmawia, SMO Dr Lalrinthangi leh Govt Official-te leh media lam te pawh an tel a ni.

He hun Dr. Ramdinthara Sailo, Med. Suptd. JW. Hospital kaihhruaiah hian Dr. Lalremmawii chuan Vision centre Lunglei a hawn theih a a awm chu Lunglei mipui leh chhimlam tan tangkai tak a nih a beisei thu sawiin Vision Centre a thawktu te hian Sorkar-ah report pek that a tul a ni, a ti. Dr. Lalremmawii chuan kumin April atanga August thla chhung khan Mizoramah mit naute zai 938 a awm thu sawiin naupang leh puitling hnenah a thlawn a tarmit te sem a ni a ti a, Eye Bank-1 leh Eye Donation Centre 2 awm in, kuminah mit darthlalang(cornea) thlak 22 a awm tih a sawi. Synod Hospital leh Sorkar in thawhhona tha tak an nei tih sawiin tunah pawh hian  thawkho zel turin Sorkar chu a in ring reng a ni a ti bawk.

Technical report pe tu  Dr.R.Lalrindiki, Opthalmologist, Synod Hospital Durtlang chuan kum 2015 atang khan Synod Hospital leh Mission for Vision Mumbai te hi an lo thawkho tawh tih sawiin tunah hian phase VI-na Lungleiah kalpui a ni a, hemi atan hian Mission for Vision Mumbai chuan cheng Nuai 10 leh sing 5 (Rs. 10.50 lakhs) pe in thawktu tur leh hmanrua(equipment) leina te a tel vek tih a sawi a, thawktu te chu JW Hospital bakah thingtlang khuaah te vak chhuakin mit en ngai te an en dawn a, zai ngai an awm anih chuan Synod Hospital Dutlangah a thlawn vek a zai sak tur an ni a, hei bakah an kalna senso  a thlawn vek a ni ang a ti. Fund rawn pe tu te hian inzaina room thianghlim leh fai tak an duh avangin tun dinhmunah Synod Hospital Durtlang chiah pawm a la ni a, a khat tawkin hei pawh hi an endik reng a, WHO kaihhruaina angin 80% tal a fai a mit zaina room kalpui tur a ni a ti. JW Hospital-ah hian zing dar 9:00 atangin nitin(Pathianni tiam lovin) mit a entir theih dawn a ni. Mit enna(Vision centre) a khawl chi hrang hrang te hi : Opthalmic Unit set, Slit Lamp, Ophthalmoscope & Retinoscope, Computer Set leh Optical Display Rack te a ni.

Attachment

  • Loading attachment...