Vawiin khan Mizoram Chief Minister Pu Zoramthanga hovin State Disaster Management Authority chuan Chief Minister’s Conference Hall, Aizawl ah meeting pawimawh an nei.

Meeting-ah hian agenda sawmpahnih chhawpchhuah a ni a. Mizoram State Disaster Management Authority chu  kum 2006-a din a nih atangin Mizoram Sawrkar hnuaiah a la kal a. Disaster Managament Act, 2005 in a sawi danin SDMA chu zalenna leh thuneihna zau zawk nei a chhiatrupna lo thlen thulha inpuahchahna tur policy te, thawhhona tur ruahmanna zam thu ah te, chhiatna lo thleng thei hrang hrang thlir lawk a pumpelh theih pumpelh a, inven dan tur duan lawk kawngah te ruahmanna zau zawk siam thei turin din ni se tih a nih angin vawiin meeting-ah hian hemi chungchang hi ngaihtuah a ni a. SDMA tichak tura staff mamawh lak belh dan tur sawiho a ni bawk.

State Disaster Response Fund (SDRF) sum hman dan chungchang pawh sawi lan niin tun dinhmunah cheng nuai 9.7 a awm mek a. Chhiatrupna thlen thulha rang taka sum mamawh hman zung zung a nih theih nan leh chhiat tawk chhungkua ten hun rei tak nghah ngai lova chhawmdawlna sum awlsam zawka an hmuh theih nan SDRF sum atang hian Emergency fund dah hran chungchang ngaihtuah a ni a. State Emergency Operation Centre leh Institute of Disaster Management dinna tur hmun hma ngaihtuah chungchang te, sawrkar laipui National Disaster Management Authority duhdan ang a SDMA hminga bank-a account hran hawn chungchang te, YMA branch hrang hrangte hman tangkai theih tur Central YMA hnena search and rescue equipments pek chhuah chungchang te, Mitigation and Rehabilitation atana DPR siam tura consultant rawih tur rawtna te, HDPE Tarpaulin lakkhawm leh semchhuah dan kalphung siam that thu te, District thar pathum - Hnahthial, Khawzawl leh Saitual a SDRF dah chungchangte an thu ngaihtuah zingah hian a tel.

The Mizoram State Disaster Management Plan 2015 chu siamthat ngai lai te siam tha in belh ngai te belh a nih hnuah State Disaster Management Authority pawmpui tura chhawpchhuah a ni a. Disaster Management Act, 2015 Section 31 (2) in  District Disaster Management Plan kum tina ennawn a siam thar (update) thin tura a tih angin District pariata District Disaster Management Authorities ten District Disaster Management Plan an siam thar chu SDMA pawmpui tura chhawpchhuah a ni bawk.

SDMA ah hian Chief Minister Pu Zoramthanga chu Chairman niin Deputy Chief Minister Pu Tawnluia chu Vice Chairman a ni a. Chief Secretary Pu Lalnunmawia chu Member Secretary leh Chief Executive Officer a ni. Vawiin meeting-ah hian Home Minister Pu Lalchamliana, Power Minister Pu R.Lalzirliana, Supply Minister Pu K.Lalrinliana leh Forest Minister Pu TJ Lalnuntluanga bakah member dangte an tel a ni.