Vawiin chawhnu khan Lunglei Town Sanitation Task Force chu an Chairman Lunglei DC Pi K. Lalrinzuali kaihhruaiin UD&PA Conference Hall-ah an thukhawm. Meeting ah hian Additional DC Pu David Liansanglura Pachuau, DUDO Lunglei Pu Andrew Lalhruaia leh sawrkar official dangte, Lunglei Sub Hqrs YMA hruaitute, Lunglei town area VC member-te leh Clean Lunglei organizers te an tel.

Lunglei DC Pi K. Lalrinzuali chuan India ram pumah faina beihpui thlak mek a ni a, nasa takin hmasawnna pawh hmuh mek a ni tiin kan state chhungah pawh sawrkar, NGO leh mipuite tawngkawpin theihtawp chhuahin khaw tinah hmasawnna hmuh a ni tawh a ni, a ti. Lunglei Town Sanitation Task Force chu khawpui faina leh thianghlimna ah thuneihna sang tak nei a nih thu tarlangin Lunglei khua in faina kawnga hma a sawn zel theihnan Task Force member-te chu theihtawp chhuah theuh turin a chah a ni. Lunglei khawpui chhung hmun hrang hrangah kawngpui nek leh kawng kama insak bungrua leh bungrua dah thin an awm a ngaih mawh thu Lunglei DC chuan a tarlang a. Hemi chungchanga hmalak dan tur leh a tul anga fine chawi tir dan tur te a Nodal Department UD&PA in lo buaipui se tih Committee chuan a rel a.

Meeting ah hian plastic khap chungchang pawh sawiho niin hemi chungchangah hian Lunglei DC in thupek a siam thuai beisei a ni a. Faina Hapta 2019 hman dan tur pawh sawiho niin a hawnna hi Mizoram huapin Aizawlah neih tur a nih thu leh a kharna hi District tin ten District headquarter ah theuh an hmang dawn a ni. Sanitation Task Force chuan Faina Hapta 2019 pual hian Lunglei District huamchhunga sawrkar pisa leh institution te ni khat tal faina hnathlang buatsaih tura ngen in an ngenna hi office hrang hrang leh school leh college ten an zawm tha hle a ni. Solid Waste Management Centre Riangvai thlanmuala siam mek chungchanga Environmental Clearance pawh sawrkarin a bawhzui mek thu leh Sawrkar laipui an dawr mek thu sawi lan a ni bawk.