Vawiin chawhma dar 10:00Am khan D.C. Conference Hall, Siaha-ah Mizoram Board of School Education (MBSE) buatsaihin Siaha District chhunga High School leh Higher Secondary Schoool zirtirtute tan ‘Training on Question Setting Technique’ tih thupui hmangin ni khat awh training buatsaih a ni. He training-ah hian MBSE siam kum 2020 Board Exam atanga hman tan tur Scheme of Examination and Question Design bakah Integrated Evaluation Scheme (IES) Software Update thar leh Software Manual chungchang inhrilh hriatna neih nghal a ni. Pu T.T. Laltanpuia, District Education Officer, Siaha District chuan vawiin programme hi a hmanpui ve a ni.

Vawiin High School leh Higher Secondary School Zirtirtute tana training buatsaih hian Mizoram a zirlaiten All India level competition hrang hrang a hma kan sawn zel theina tur leh hetiang inelna sang zawka kan hlawhchham thinna te chu mithiam zawkten zirchiangin ngaituahna thar leh kalkawng tha zawk tur ngaituahin hetiang lam hawi a bultan hmasak hi thil pawimawh leh tihmakmawh ah a ngai a ni. Board Exam pass percentage kum tinin a sang a, chutihrualin  Mizo zirlaite India ram chhung hmun dangte leh ram pawna zirlai dangte  nena an inelnaah a ti tha lo leh a hniam zawkah an tang fo mai a, hei hian quality education kan neih that tawk lohzia a tilang nia hriat a ni. Zirchianna hrang hrang neih hnuah exam-a zawhna set dan hian pawimawhna thuk tak neiin kan zirlaite leh zirtirtuteah nghawng nasa tak a nei tih hmuhchhuah a ni a. Hei vang hian Board pawhin kum 2020 HSLC leh HSSLC exam atanga hman turin exam dan kalphung leh zawhna zawh dan thar a duang a. Hemi zulzui hian kumin atangin zirtirna pawh kalpui mek a ni. A tum ber chu Content-Based Question atanga Competency Based Question tam zawk zirlai naupangte tana chhawp chhuah niin, hei hian an ngaihtuahna hman thiam kawngah te, an hmalam hun atan leh school-a zirna kalpui danah tha zawka nghawng a neih ngei beisei a ni.

Tin, kum hmasa lam atanga hman tawh IES software chu tha leh zuala thuam that niin hemi hunah hian a hman dan (user manual) nena sem nghal a ni. Training hi Pu Michael Lalrinmawia, Academic Officer MBSE leh Pu F. Ricky Lalremruatpuia, Regional Officer, MBSE te’n an pe a ni.

Training hi Aizawl, Mamit, Kolasib, Champhai leh Lunglei District ahte neih tawh niin, vawiin hi Siaha District ah hman a ni a, district dangah pawh neih leh zel tura ruahman a ni bawk. Vawiin training chhimtu Siaha District a High School leh Higher Secondary School zirtirtuten an hlawkpui hle a ni.