Rural Development Minister Pu Lalruatkima chuan vawiin chawhnu khan Maubuang khua a Nauban hmunpui tur (Mizoram Orchid Centre) sak mek chu a hmunah kal in a enfiah a, Minister hi Pu Lalhmingthanga, Commissioner/Secretary, Rural Development Department leh RD officer pawimawh ten an tawiawm a ni.

Maubuanga Mizoram Orchid Centre sak mek hi Maubuang khaw dai chhim lamah awmin a hmun hi Maubuang khawtlangin an pek a ni a, Shyama Prasad Mukherji Rurban Mission (NRuM) scheme hnuaia sak niin project cost hi Rs. 3.9 crore a ni a. Mizoram Technocrats Company (p) Ltd. ten kum 2018 February thla atang khan a sak hna an tan a ni. He Centre chhungah hian Guest House, Staff Quarters, Conference Hall, Research Station, Laboratory, Tissue Culture Chamber, Green House engemawzat leh Car Parking te siam a ni a, he centre hi hman theih a hawn a nih hunah Public-Private Partnership (PPP) Mode a kalpui tur a ni ang.

Minister chuan Nauban hmunpui siam mek chu Maubuang khua mai bakah Mizoram tan pawha pawimawh a ni a ti a, Nauban hi khawvelin a ngaihlu em em a, Mizoramah hian Nauban chi hrang hrang 253 chhinchhiah a ni tawh a, Maubuang khua chu Tropic of Cancer in a tan tlang khua a nih avangin leh a sik leh sa in a zir bawk avangin Nauban that duhna hmun a ni a, Maubuang ram leh a chhehvel hi Nauban chi chi hrang hrang neih that lamah India rama dinhmun palina hauh tu an ni a ti a, Nauban humhalh kawnga mipuite thanharh a tul thu sawiin a bik takin kan State Flower 'Senhri' phei chi chimit maithei dinhmun ah a ding a ni a ti. Minister chuan Nauban hmunpui chu a nih ang taka hawn a nih hunah chuan mithiam thil zir bing mi (researcher) ten an chhawr tangkai bakah khawtlang mipuite leh helama tui mite tan pawh eizawnna tha tak a la nih theih dawn thu a sawi a. He Centre hi hawn theih a peihfel thuai a nih theihnan a tihtur pawimawh la awm te pawh Maubuang khawtlang hruaitute, Department official te leh a satu Contractor te nen an sawiho nghal a ni.

Maubuang a tlawh hnu hian Minister Pu Lalruatkima chuan Aibawk a Mini Sports Complex sak mek a tlawh haw nghal a, hnathawh kal lai mek te a thlir a ni. Aibawk Mini Sports Complex hi Rural Development Department hnuaiah NLCPR kaltlangin Rs nuaih zali senga sak tur a ni a, NECS in a sak hna hi thawkin kum 2018 a sak tan a ni a, kum hnih chhunga sak zawh tur a ni. He mini sports complex ah hian football playground 100 metre x 60 metre a lian sak tur a ni a, underground drainage siam tur a ni bawk, hei bakah hian Contact Sports Centre sak tel tur a ni a, football ground sirah hian gallery leh pavillion sak a ni bawk ang. He mini sports complex hi a nih ang tur taka sak a nih theih nan PWD leh S hool Education department ten an ram an sahthlak a ni.