Lunglei-Tlabung-Kawrpuichhuahkawnglaih chungchangah vawiin khan Saikuti hall, Lunglei-ah vantlang inkhawm (Public Hearing) neih a ni a, PWD-in he kawng an laih tur atana ‘Environmental Clearance’ sorkar laipui atanga an neih theihna tur atana mipui ngaihdan lakkhawmna tura huaihawt a ni. He hunah hian kawng laihin a nghawng tur khaw hrang hrang - Hauruang, Pachang, Phairuang, Rotlang, Lungsen, Sihphir, Tuichawng, Tlabung, Lunglei - atangin mi 547 an kalkhawm a ni.

Mizoram State Pollution Control Board huaihawt Public Hearing-ah hian inkhawm kaihruaitu Lunglei District Addl. DC Dr. Andrew H.Vanlaldika chuan Project pawimawhna leh kawngtha mamawhna te a sawi a. Er. SR Lalramthanga, AE, PWD hnen atangin Technical Report ngaihthlak a nih bakah Dr.Lalramnghaki Pachuau, Scientist, State Pollution Board hnen atangin Public Hearing neih a nihna chhan leh a pawimawhna kimchanga ngaihthlak a ni bawk.

Vawiina Public Hearing neih takah hian mipuite hnen atangin kawnglaih chungchanga an ngaihdan leh rawtna an neihte ngaihthlakna hun hman a ni a, zawhna an neihte hi Project Implementin Unit (PIU) Director Er.Lalrinkima Hnamte, SE, PWD-in a chhang a ni. Kawnglaih avanga harsatna hrang hrang, environemt lama nghawng a neih thei dan tur chungchangte, in leh lo ram a tihchhiat theih dan tur chungchang te leh heng harsatna awmthei turte tihnep emaw sutkian dan tur PWD lam atanga ruahmanna awmte sawiho a ni.