Vawiin khan Printing and Stationery Minister Pu C. Ngunlianchunga chuan Directorate of Printing and Stationery Department chu tlawhin, office hnathawkte nen inkawmna hun an hmang.

Minister chuan Printing and Stationery Department chu an hmachhawp siam tawh te umzuipui zel a, chawk zawka kalpui a tiam a. Amaherawhchu kal dan phung thalote a awm anih chuan chung chu thlauh thla ngam turin department hnathawkte chu a fuih. Printing & Stationery Department chu Mizoram Sorkar press a nih angin, an thil print-ah te an fimkhur hle a ngai a. Mahni hna theuhvah taima leh rinawm taka thawk turin leh, famkimlohnaah te pawh insawiseltawn mai lova inpuitlang zawk turin Minister chuan a chah bawk.

Vawiin inkawmkhawmna hun hi Printing & Stationery Controller Pu H. Laizika’n a kaihruai a. Officer-ten Minister hovin Department hmalaknate sawihona hun an nei bawk. Minister hian Printing & Stationery Department khawl neihte a enfiah bakah Luangmual a Printing & Stationery Depot a tlawh nghal bawk a ni.

Printing & Stationery Department-ah hian tunah thawktu 229 an awm a. He Department hi printing leh a kaihhnawih bakah phai lama stationery bungrua laknaa a crore tela luangchhuak thin venna atan leh, helama sumdawngte hmasawnna tura ruahmanna siam kawngah a pawimawh hle a ni.