2008/2022-2023
Lunglei the 21st September, 2022 – Lunglei khawpui chhung kawng siam that hna kal mek dinhmun leh hmachhawpte sawihovin vawiinah khan Lunglei High Powered Committee (HPC) Conference Hall, Chanmari ah Lunglei HPC Vice Chairman Pu Lawmawma Tochhawng hovin meeting neih a ni.

Metting-ah hian Lunglei DC Pu Kulothungan A, SP Pu Rex Zarzoliana Vanchhawng leh PWD, PHE leh UD&PA hotute bakah Lunglei MJA, Sub Hqrs YMA leh MHIP hruaitute leh he kawng siam that hna thawktu contractor an tel a ni.

Lunglei HPC Vice Chairman Pu Lawmawma Tochhawng chuan Lunglei khawpui chhung kawng siam that hnathawhna ah a mawhphurtuten tan kan lak tlan a tul takzet a ni tiin hnathawh thlen chin tawh leh hmabak te, leh hnathawhna kawnga harsatna awmte sawiho tura meeting koh anih thu a sawi a. Lunglei District huam chhunga kawng siam mamawh chungchang te pawh a changtu Department PWD hotute ah vawi engemawzat thlen niin bawhzui zel a ni a, fur ruahtui tlak laiin duh angin hmalak chak theih anih loh thu a sawi a. Lunglei khawpui chhung kawng, Pialthleng panna kawng leh Khawiva panna kawng te ngai pawimawh hmasa turin Department official-te a chah bawk a ni.

Lunglei DC Pu Kulothungan A chuan Lunglei District kawng chungchangah tun kar September ni 19 khan PWD hotute nen meeting an neih thu leh mamawh hrang hrangte Engineer in Chief hnenah lehkha a thlen anih thu a report a. September ni 23 (Zirtawpni) hian ATL Lunglei to Thenzawl kawng siam hnathawktu Bhavya Constructions-te meeting tura an koh thu a report bawk.

Pu Lalrammawia Renthlei SDO, PWD chuan report pe in Lunglei khawpui chhung kawng siam hna thawk turin PWD hnuaia Class I contractor Pu PC Lalthantluanga thlan fel tawh niin a hnathawhna tur sum agreement amount hi cheng vaibelchhe 5.9 anih thu a sawi a. Work order hi June ni 8, 2022 ah chhuakin hnathawh hun chhung tura tih hi kumin June atanga December thleng a ni a. Hna hi June ni 20 atanga kalpui chhoh mek niin Lunglei khawpui chhunga tui chhe paihna (drainage system) ruahman mumal awmloh avang te, PHE pipe hlui tawh leak nasat avang te leh mimal in neitu tam takin kawngpui ah tui an paih mai avang te in hnathawh a hautak in kawng a ti tlo lo em em a. Fur ruahtui tlak tam laia hnathawh chak a harsat mai bakah tui luan kawr siam that leh culvert siam that tur tam tak a awm avangin hnathawh a kal chak theihloh thu report a ni.

PHE SE Er Ngentluanga pawhin report pe in Lunglei khawpui chhunga tui supply pipe tam zawk chu 1993-94 chhova phum an nih thu leh hmun tam takah siam that a ngaih thu a sawi a. Hemi chungchangah hian project siam tawh niin Detailed Project Report (DPR) sawrkar laipuiah thehluh tawh anih thu a report.

DUDO, UD&PA Department Pi Vanthangpuii chuan Lunglei khawpui chhunga side drain siam tha turin project peih fel tawh niin sawrkarah cheng nuai 80 dil mek anih thu a report bawk.