1103/2026-2027

Lunglei, 2026 Nikir thla ni 21: 2 Mizo Battalion National Cadet Corps (NCC), Lunglei huaihawtin nimin khan 'International Yoga Day' ṭum 12-na chu "Yoga for Healthy Ageing" (Hrisel taka kum chhiar chhoh nan yoga) tih thupui hmangin Lunglei, Siaha, Lawngtlai leh Chawngteah te hlawhtling taka lawm a ni.

Lungleiah chuan C. Ṭhuamluaia Mualah yoga puala ni bik hi hman niin, Lunglei District Administration leh Police lam ai awhte, 166 Infantry Battalion (TA), 23 Assam Rifles, ECHS Lunglei, 2nd MAP Battalion, District Sports & Youth Office leh Ex-Servicemen te bakah, Arm Wrestling-a National Silver Medallist Emily C. Rohluzuali leh zaithiam Felu Hauhnar te'n hun an hmanpui a. Hemi rual hiam Government Saiha College, Siaha; Don Bosco School, Lawngtlai leh Astro Turf Football Ground, Chawngteah te NCC huaihawtin International Yoga Day pualin hun hman a ni ve bawk a. 2 Mizo Bn NCC hotute, zirtirtute leh zirlai naupang (cadet) 800 vel bawr nen yoga hmanga insawizawina hun hman ho a ni.

C. Ṭhuamluaia Muala International Yoga Day hmannaah hian G21 Fitness Centre dintu, certified trainer Miss Gracy leh a thawhpuite chuan yoga hmanga insawizawi dan entirin, anni kaihhruai hian yoga hmanga insawizawi dan hrang hrangin kal khawmte chu a rual tlangin an insawizawi a. Insawizawi pah hian taksa leh rilru hriselna atana yoga ṭhatna leh ṭangkainate zir ho nghal a ni a. 2 Mizo Bn NCC Commanding Officer Col. Sagar K. Mohanty chuan lawm thu sawiin hun a khar.

United Nations (UN) chuan kum 2014 khan June ni 21 hi yoga pual ni bik, 'International Yoga Day' atan puangin, kum 2015 aṭang khan khawvel pumah he ni hi kum tin June ni 21-ah hman ṭhin a ni.