1102/2026-2027

Aizawl, the 21st June, 2026: Khawvel hmun dangte rualin tukin khan 12th International Day of Yoga chu, "Yoga for Healthy Ageing" tih thupui hmangin 34 Assam Rifles Helipad, Zokhawsangah lawm a ni. National AYUSH Mission, Directorate of AYUSH bultuma hun hman hi Mizoram Larsap, General (Dr) Vijay Kumar Singh, PVSM, AVSM, YSM (Retd) chuan Khuallian niin a hmanpui a, Health & Family Welfare Minister Pi Lalrinpuii chu Khualzahawm a ni.

He ni puala kalkhawmte hmaa thu a sawiah Larsap General (Dr) Vijay Kumar Singh Prime Minister Pu Narendra Modi hmalaknain Yoga chu khawvel pum hriat hlawh leh ngaihven a nih thu sawiin, khawvel puma hman theih tura UNO-in a pawmpuiatanga kum 12-na hmel International Day of Yoga-in a hmu ta chu lawmawm a tih thu a sawi a. Yoga chu taksa, rilru leh ngaihtuahnate tha taka thlunzawma hriselna tha thlentu a nih thu sawiin, yoga exercise hrang hrangte chuan taksa leh rilru hrisel nan tinzawn leh hnathawh dan bik an neih hran theuh a, tangkai taka hman a nih theih nan tih dan dik common yoga protocol zawm a tul thu a sawi a ni.

Larsap chuan yoga awmzia leh tih dan dikte sawiin, yoga chu thlan tih tlak nana ruahman a nih loh thu leh taksa leh rilru lamte inrem taka siamtu a nih zawk thu a sawi a. Hun tam aiin tih dan phung dik a mamawh zawk thu sawiin, taksa tih chet vak vak lam a kawk lova, boruak hip luh leh thawk chhuah mil zela chet lak a pawimawh a, tih dan hrang hrangte hi natna bik ti dam thei tura duan a ni, a ti. Yoga chu exercise awlsam leh hmanraw mamawh tlem a nih avanga mitin banphak a nih thu sawiin, hmunhma a mamawh tam loh avangin khawi hmunah pawh tih a remchan thu a sawi a. International Day of Yoga hlawhtling taka hman a nih theih nana National AYUSH Mission, Directorate of AYUSH, 34 Assam Rifles, Mizo Air Sqn. NCC leh he huna tel zawng zawngte fakawm a tih thu a sawi bawk.

Health & Family Welfare Minister Pi Lalrinpuii chuan khawvel hmun dangte ruala Mizoramin khawvel pum huap hriselna lam hawi hmalakna lian leh pawimawh tak International Day of Yoga puala hun hman a ni chu lawmawm a tih thu a sawi a. Yoga chuan nitin khawsak buai leh hah tak karah mihringte muanna leh rilru fim a pek thu sawi a. Taksa leh rilru sawizawina awlsam leh mitin tana tih theih a nih thu a sawi bawk.

Chief Secretary Pu Khilli Ram Meena chuan Mizoram sawrkarin mipuite hrisel nan AYUSH  kaltlanga hma a lak zel dawn thu sawiin, pipu atanga thiamna chhawm zel leh tunlai thiamna thar ber berte tangkawp kaltlangin mipui hriselna tihhmasawn zel tum a nih thu a sawi bawk.

International Yoga Day 2026 lawmnaah hian Col Laldinpuia, Commandant, 34 Assam Rifles chuan kalkhawmte lawmna thu a sawi a. Yoga Crew, National AYUSH Mission-te kaihhruaiin yoga tih dan tur dik "Common Yoga Protocol" tarlan angin yoga exercise chi hrang hrang hmangin kalkhawm ten taksa leh rilru sawizawina hun an hmang a. India ram puma International Day of Yoga 2026 lawmna pui ber, Red Road, Kolkata, West Bengal-a hman chu biak hmuh theihna kaltlanga chhim niin Prime Minister Pu Narendra Modi thusawi ngaihthlak a ni a. Dr. Mara S. Thansiami, Mission Director, National AYUSH Mission, Health & Family Welfare Department chuan lawmthu sawiin hun hman a khar a ni.

International Day of Yoga pual hian Mizoram hmun hrang hrang - District Hospital, Health & Welness Centre, Zirna in leh pawl hrang hrang ten an remchan dan ang zelin hun an hmang bawk a. Kumin hian thupui atan "Yoga for Healthy Ageing" tih hman niin, hei hian a tum ber chu rilru leh taksa hrisel tak nen upat hun hmang thei tura yoga chhawr tangkai a ni.

He hunah hian Assam Rifles, Mizo Air Sqn. NCC leh Sawrkar official pawimawhte tiamin mi 300 vel an tel a ni.