1101/2026-2027

Dated Hnahthial, the 21st June 2026:

Special Intensive Revision, 2026 chu Mizoram pumah kalpui mek zel niin tukin zing dar 8 khan Hnahthial District Election Officer hnuaia Assembly Constituency awm chhun, 29-South Tuipui Assembly Constituency tan Enumeration Form sem chhuahte chu Digitized fel an ni a. Form semchhuah zinga 6.37% chu Absent, Shifted, Dead leh Duplicate (ASDD) avangin lak let theih an ni lo a ni. 

South Tuipui A/C chhungah hian Enumeration Form 16,478 semchhuah niin chung zinga 1049 (6.37%) te chu chhan hrang hrang- mahni vote neihna hmuna awm tawh lo (Absent), Insawn (Shifted), Mitthi (Dead) leh list a awm nawn palh (Duplicate) vangin an Enumeration Form a lak let theih tawh loh va. Heng ASDD-te chhiar tel loh hian Enumeration Form semchhuah 15,429 te tan Digitization Process hi tukin zing dar 8 khan zawh fel a ni. 

House to House Enumeration Phase hi May ni 30 atang khan neih tan niin Enumeration From hi June ni 9 khan sem zawh a ni a. Digitization process hi kalpui nghal niin chak zawka kalpui a nih theih nan June ni 10 khan Hnahthial District Election Officer hmalakna hnuaiah Special Digitization Drive chu Hnahthial District chhunga Booth Level Officer 27-te tan neih a lo ni tawh bawk. 

House to House Enumeration Phase hi June ni 28 thleng neih tur niin Draft Roll hi July ni 4 (Inrinni), 2026 ah tarchhuah tur a ni dawn a, August ni 4, 2026 thleng inthun leh paih dilna hun siam a ni ang.