Nimin khan MJA Lunglei Tripura Tour nei mekte chuan Gas Thermal Power Station, Baramura an tlawh a, hetah hian Tripura State Electricity Corporation Ltd. General Manager Pu M.K.Chakraborty leh a thawhpui ten tha taka lo dawngsawngin Lunch an lo buatsaih sak nghal bawk.

Baramura Power Station-ah hian Unit 4 & 5 atangin 42Mw an siam chhuak a, hei hi Manipur leh Mizoram pawhin an lei chhawng ve a ni. Tripura hian 50% an chang a, abak 50% hi Mizoram leh Manipur-ah pek chhuah a ni a, Mizoram hian 9Mw an chang a, Manipur hian 10Mw vel an chang ve bawk. Pu Chakraborty hian 350 MW pe chhuak thei Palatana Gas Thermal Power Plant Unit 1 chu tunah hian Commissioned theih tep anih tawh thu leh June thla hian India President hawn tir tum anih thu a sawi a, Mizoram pawhin 20 Mw an chang ve dawn a ni tiin, power supply na tur in hrui lian Power Grid Corporation of India in a thlun mek thu leh an hriat theih chinah Silchar thleng thlun a nih tawh thu a sawi a, 350 Mw pe chhuak thei tur bawk Palatana Gas Thermal Power Plant Unit 2 pawh tunah hian siam tan leh mek anih thu a sawi bawk.

Baramura Gas Thermal Power Plant hi Agartala atanga 35Km a hlaa awm a ni a, 1985- 1986 khan siam tan a ni a, Unit 1,2 leh 3 te chu hman chhunzawm ani tawh lova Unit 4 hi 2002 a siam niin, Unit 5 hi 2010 a siam a ni a, he Power Plant hi Tripura-a Gas hmanga power an siam chhuah hmasak ber a ni.

Hei bakah hian Chanchinbumi te hian Baramura an panna kawngah hian Agartala bula Bodhjunj Nagar Industrial Growth Centre chu an tlawh nghal a, hetah hian India rama Company lian ber ber 22 lai an inkhuar a, Tripura hmasawnna kawng atana pawimawh ber pakhat an nih thu leh anmahni kaltlang hian thalai tam takin hna an hmuh thu an sawi a ni.

Mizoram chanchinbu mi te hi Pu Bibhuti Debbarma, Information & Cultural Officer, Govt. of Tripura in buaipuiin an mamawhna apiangah a hruai a ni.