846/2026-2027

Lunglei, 2026 Nikir thla ni 4: Lunglei Municipal Council (LMC) chuan vawiin khan Mizoram sawrkara Health & Family Welfare Minister Pi Lalrinpuii (Lunglei East bialtu MLA) hnenah National Women's Icon Award a dawn avangin lawmpuina thilpek an hlan.

Hemi puala LMC Board of Councillors Meeting Hall-a inkhawm buatsaih chu LMC Executive Councillor Pi Lalhruaitluangi Sailo chuan kaihruaiin, LMC Chairman Pu Lalzuithanga chuan Minister Pi Lalrinpuii kutah LMC ai awha lawmpuina thilpek hlanin, lawmpuina thu a sawi.

Pu Lalzuithanga chuan Pi Lalrinpuii'n Award a dawn chu LMC chuan a lawmpuiin, a chhuang tak zet tih a sawi a. Award a dawng tih an hriatin LMC anga chawimawina hun buatsaih an duh thu sawiin, lawmpuitu neuh neuh an awm avangin a hnukhawiah an che thei chauh tih a sawi a. Pi Lalrinpuii chu Lunglei tan mai ni lo, Mizoram tan chhuan tham a nih thu a sawi.

National Women's Icon Award dawngtu Minister Pi Lalrinpuii chuan LMC hotute'n amah lawmpuina an buatsaih chu lawmawm a tih thu sawiin, Award a dawn chu ama mimal thil tih ṭhat vang nia a hriat loh thu leh Award petute'n a chanchin aṭanga an ngaih hlut ber chu Universal Health Care System leh mitthi ruang phurhna an tihhlawhtlin chu nia a hriat thu a sawi a. Chuti ang tihlawhtling thei tura zir chianna leh ruahmanna kalpuitute leh a hlawhtlin tak takna tura Chief Minister leh a thawhpuite inhawnna zar a zo tih a sawi.

Pi Lalrinpuii chuan Award hlanna inkhawmah India ram mi pawimawh tak tak leh Foreign lama an thawhpui eng emaw zat an tel thu sawiin, Mizoram chu India ram hmarchhak kila awm, mihring tlemna kan nih avanga Corporate Social Responsibility sum te pawhin a thlen phak loh thu a sawi leh hma lakpui tura kal khawmte a sawmna chu an ngaihvenin, Award semna inkhawma thu sawitu dangte pawhin an sawi lang zui nghal tih a sawi a. Chumi kal zelah chuan Civil Hospital Lungleia CT Scan khawl thar tur bakah, MRI khawl te nei thei tura beisei a nih thu sawiin, he'ng hi mipuite'n ṭangkai taka an hman a beisei thu a sawi.

Lunglei High Powered Committee (HPC) Vice Chairman Pu V. Malsawmtluanga pawhin thu sawiin, Pi Lalrinpuii chu a thil tuma chiang, tihtak zeta thil ti ṭhin mi a ni tih a hriat chian thu a sawi a. A Award dawn chu a phu hle tih sawiin, Lunglei aṭanga Cabinet Minister awm chhun nih a tlin thu leh Lunglei District mipuite leh MLA-te ai a awh zo hle tih a sawi.

LMC Chief Executive Officer Pu Lalhmansanga pawhin thu sawiin, India ramin ram ṭhang mek dinhmun aṭanga ram hmasawn dinhmun luah tura hma a lakna kawngah hma a lak ṭhat avangin Pi Lalrinpuii chuan Award hi a dawng tih a sawi a. India ram hawi lam mila hma la thei leh chawimawi tlak a nih avangin an lawmpuiin, an chhuang hle tih a sawi bawk.