3937/2022-2023
Pi Ramdinliani, Deputy Commissioner & District Municipal Election Officer, Lunglei chuan 21st March,2023 khan Lunglei Municipal Council inthlanna lo awm tur chungchangah a hnuai a mi ang hian hriattirna a chhuah.
Kan hma lawka Lunglei Municipal Council Inthlanpui lo awm tur atan dik, felfai leh thianghlim taka mipuite'n duh an thlan theihna turin State Election Commission (SEC), Mizoram chuan inthlan laia lirthei hman dan tur chungchangah March ni 13, 2023 khan hetiang hian thupek a chhuah a.
i. A thlawn (man chawi lo) a vote thlak turte hruai leh thlahna turin candidate emaw, election agent-in emaw lirthei an hman phal a ni lo.
ii. Inthlan ni atan hian candidate-te chu hetiang hian lirthei hman phalsak anni:
a) Candidate tan pakhat;
b) Election agent leh party worker-te tan pahnih.
iii. Chutianga hman tur lirtheite chu SEC-in format a buatsaihsa 'Lehkha pawl' hmangin District Municipal Election Officer-in phalna a pe chhuak ang a, phalna lehkha chu langsar takin lirthei hma lam darthlalangah tar tur a ni. Political party hruaitu te, Minister te, party worker te, agent-te leh candidate tantute reng rengin lirthei dang an hman rem tih a ni lo bawk. Hemi atan hian vote thlak hma ni hnih (March ni 27, 2023) hma ngeiin phalna hi pek chhuah a ni ang.
iv. Candidate emaw, election agent emaw, worker emaw chu lirthei ke hnih/thum/li nei (Car, taxi, rickshaw leh bike/scooter) emaw chauh hman phalsak anni.
Inthlan ni-ah chuan lirthei ke li neiah hian a khalhtu tiamin mi panga aia tam lo chauh chuanga tei vah phal a ni. Tin, phalna pek lirtheite hi, anmahni: candidate leh election agent tih loh midangin an hman ve phal a ni lo.
v. He lirthei khuah khirhna hian lirthei ke hnih nei, bike leh scooter-te pawh, March ni 28 (Thawhlehni) tlai lam dar 4 atanga a tuk, inthlan ni, March ni 29 (Nilaini), vote thlak zawh hun thleng a huam a, amaherawhchu, sawrkar hnathawkte'n dam lo emaw, upa leh tar chak lo zawkte phurhna tura an hman erawh phal a ni.
vi. A chunga inkaihhruaina tarlan bawhchhiate chu Motor Vehicles Act, 1988 mai bakah Chapter IX (A) of the Indian Penal Code hmangin hrem an ni ang.
vii. Amaherawhchu, mipui tana buaina leh harsatna siam a, inthlan nia lirthei zawng zawngte chet vel khap vek erawh SEC chuan a tum lo a. Inthlanna kaihhnawih a nih loh phawt chuan, thil pawimawh leh tul bikahte chuan heng a hnuaia tarlan lirtheite hi an tlan phalsak a ni:
a) Mimal lirthei, election kaihhnawih ni lo, mimal thil pawimawhah;
b) Mimal lirthei, lirthei neitu emaw, a chhungte emaw vote thlak tura polling station-a kalna turin, polling station atanga 200m aia hnai lo-ah.
c) Essential service-e, heng; damdawi in motor, ambulance, bawnghnute sem, tui sem, PWD duty, P&E duty, police duty, leh election atana officer duty-te.
d) Town bus te;
e) Taxi leh rickshaw, loh theih loh thilah chuan;
f) Mimal lirthei, damlo phurhna atana hman leh rualban lote tei vahna atan hman lirtheite.
SEC thupek angin candidate leh anmahni tantute lirthei hmante hi uluk tak leh chik takin District Administration chuan a vil reng dawn a, hriam hrei leh dan phal loh thil dang phurh emaw, buaina leh innghirghona tichhuak thei zawnga an che a nih chuan lirthei neitu te, lirtheia chuangte leh candidate chu dan hnuaiah hremna pek an ni ang a, an lirthei hmante pawh mansakin, inthlanna zawh fel a nih hma loh chu hrensak an ni ang.
