988/2025-2026

Lunglei, 2025 Nikir thla ni 27: Vawiin khan Lunglei Officers' Club (LOC) leh Lunglei District Hub for Empowerment of Women (DHEW), District Programme Officer (WCD) Office ṭang kawp huaihawtin Baptist Higher Secondary School (BHSS), Lungleiah zirlaite an hma lam hun atana kaihhruaina leh kawng kawhhmuhna, 'career awareness programme' buatsaih a ni.

BHSS Tucker Hall-a programme buatsaih hi District Bawrhsap Pi Navneet Mann chuan khuallian nia hmanpuiin, zirlaite fuihna thu a sawi a. Zirlaite chu an tui zawng leh thiam zawng hre chiang a, chumi lam hawi chuan ke pen tura chahin, hna an zawn hunah pawh nuam ti taka an thawh thei tur thlang turin a chah a. Hma hun ngaihtuah luat vanga buai tur a nih loh laiin, zirlai nih lai aṭanga mahni hma hun tur lo thlir lawk erawh chu a ṭul tiin, hlawhtling turin tum ruhna, tei rei peihna leh taimakna neih a ṭul, a ti a. Zirlaite, a bik takin hmeichhiate chu mi danga innghah ngai lo tura mi hlawhtling leh intodelh nih tum turin a fuih a ni.

He hunah hian resource person pathum awmin, Lunglei District Sainik Welfare & Resettlement Officer & LOC Career Awareness Sub-Committee (CASC) Member Maj. Rebecca L. Chhakchhuak chuan zirlaite an zir lai leh zir zawh hnua an inbuatsaih dan tur te, hna vang tawh tak kara inelna hmachhawn thei tur leh mahni kutkawiha ei zawnna bul ṭan thei tura rilru put hmang dik leh nunphung ṭha te a zirtir a. Lunglei District Additional Superintendent of Police Pu K. Beihmotaosa chuan internet kal tlanga pawi khawihna (cyber crime) chungchang leh a inven dan tur a zirtir a. Lunglei District Settlement Officer & LOC Secretary Pu Beitlotha Nohro chuan zirna kawng tluang pangngai baka ei zawnna leh hna thawh tur hrang hrang awmte, thiam thil pei pun dan te, hlawhtling tura thil pawimawh hrang hrang leh inbuatsaih dan tur te a zirtir a. Zawhna leh chhanna hun hman a ni bawk.

BHSS Principal leh zirtirtute uapna hnuaiah class XI & XII zirlaite'n he hun hi chhimin, LOC office bearer leh executive committee member te'n hun an hmanpui a. LOC Vice President & CASC Convener Pu Lalrotluanga'n hun kaihruaiin, LOC President Pu Francis Lalnuntluanga Ralte chuan LOC-in career awareness programme a ruahman chhan leh hma lak an tum dan a sawi fiah a. BHSS Principal Pu C. Lalhmingmuana pawhin thu sawiin, LOC Executive Committee Member & CASC Member Pu R. Lalrochama'n lawm thu sawiin hun a khar a ni.