989/2025-2026

Lunglei, 2025 Nikir thla ni 27: June ni 29, 2025 (Path-a National Statistics Day vawi 19-na lo thleng tur pualin vawiin khan Lunglei District District Research Office huaihawtin Lunglei Press Club-ah '75 Years of National Sample Survey' tih thupui hmangin hun hman a ni.

He hun hi Lunglei District Research Officer (DRO) Pu TC Zonunsanga'n kaihruaiin, Day hman chhan leh kal khawmte lawmna thu a sawi a. Khuallian, professional footballer Pu Lallianzuala Chhangte chuan statistic (thil ṭul leh mamawh zat lawr khawm) chu mimal leh pawl bakah, sawrkar tan hmasawnna hna thawh kawngah a pawimawh hle tih sawiin, ruahmanna ṭha siam turin thil tam lam emaw, a hlat zawng emaw te hriat hmasak a ngai ṭhin a, chumi atan chuan zir chian phawt a ṭul ṭhin, a ti a. Football khelhnaah pawh statistic chu a pawimawh hle tih sawiin, khelhpui turte dinhmun zir chian a, hriat chian chu an tum ber a nih ṭhin thu a sawi a. Ngaihsan tur dik leh entawn tur dik hriat a ṭul thu te, hlawhtling tura thawh rim a ṭul dan te, kawng eng kimah rinawm a pawimawh thu te sawiin, zirlaite chu an zir lai ngai pawimawh hmasa ber turin a fuih bawk.

He hunah hian sawrkar official-te, registrar of births & deaths te, MJA member-te leh Adventist English School zirlaite an kal khawm a. Sub-Inspector of Statistics Pu H. Lalramchhana'n Prof. PC Mahalanobis chanchin leh statistician ropui a nih dan bakah, a hma lakna leh sulhnute a sawi a ni.

India ram tana statistics lama sul sutu thawh hlawk tak Prof. Prasanta Chandra Mahalanobis-a chawimawi nan leh hriat reng nan a pian cham June ni 29 hi India sawrkar chuan kum 2007 khan Statistics Day-ah puangin, kum tin hman a ni ṭhin a. Prof. PC Mahalanobis hi kum 1893 June ni 29 khan a lo piang a. Scientist leh statistician niin, 1931 kuma Indian Statistical Institute (ISI) dintu a ni.