906/2023-2024

Lunglei the 24^th June, 2023 – Principal Distribution Centre (PDC), Luangmual Lungleia hman tur Digital Weighbridge chu vawiin khan Lunglei HPC Vice Chairman Pu Lawmawma Tochhawng in a hawng. Digital Weighbridge hi computer hmanga buhfai leh thildang a phurtu motor chawpa rang leh dik taka bukna khawl a ni.

Hawnna inkhawm hi Pi Teresy Vanlalhruaii, Secretary, FCS&CA in kaihruaiin FCS&CA Department thawktute, Lunglei District officials-te, Lunglei District Consumer Association hruaitute, Lunglei MJA hruaitute, leh sawm bik dangte an tel a ni.

Lunglei HPC Vice Chairman Pu Lawmawma Tochhawng chuan PDC Luangmual Digital Weighbridge thar chu hmasawnna lawmawm tak a ni tiin, he weighbridge ti puitling tura hma la tu FCS&CA Minister Pu K. Lalrinliana leh a thawhpuite chungah lawmthu a sawi a. Khawvela ram changkang apiangah consumer-te dikna chanvo ngaih pawimawh anih thu sawiin Lunglei HPC Vice Chairman chuan PDC Luangmuala digital weighbridge chu consumer rights tih hmasawnna kawnga hmanraw pawimawh tak anih chhoh ngei a beisei thu a sawi a ni.

Vawiin program-ah hian Lunglei DC Pi Ramdinliani’n kalkhawmte lawmna thu sawiin, Pu C. Zadailova, Joint Director, FCS&CA in Technical Report pe in, Pi Lalhlimpuii Ralte, DCSO Lunglei in lawmthu sawina hun a hmang a ni.

Digital Weighbridge pakhat leh a bunna man hi Rs. 10,84,420/- niin SEDP atanga ruahman a ni a. PDC, Luangmuala Digital Weighbridge bun hi Leotronic Scales Private Limited, Amritsar, Punjab te siam a ni a. A len zawng hi 9x3 metres niin, quintal 600 a rit thleng a buk thei a. Civil foundation leh control room siam leh tih that hna te hi nikum 2022 khan thawh niin khawl bun hna hi 2022 chhung leh 2023 ah thawh a ni a. He Weighbridge tih puitlin ngei anih theihna tur hian Lunglei District Consumer Association leh FCS&CA thawktuten theihtawp an chhuah tlan thu pawh report a ni.