All India Council of Technical Institutions(AICTE)-NEQIP bultumin Multipurpose Hall, Mizoram Polytechnic(MPL), Lunglei-ah ni 2 awh tur ‘Regional Seminar on Solid Waste Management & Safe Drinking Water’ chu vawiin khan Lunglei DC Pu Abhijit Vijay Chaudhari-in a hawng.

Seminar hawnna inkhawm MPL Faculty Pu Zoramchhana kaihhruaiah Khuallian Pu Abhijit Chaudhari chuan bawlhhlawh sawngbawl hi khawvel pumah buaipui tham a tling tawh a, India sorkar pawhin ramchhung fai leh thianghlim siam chu ngai pawimawhin ‘Swacch Bharat Campaign’ a tan ta hial a ni a; chuvangin vawiina solid waste management chungchang zirhova Mizoram bik atan bawlhhlawh sawngbawl dante ngaihtuah ho tura seminar nei thei a nih chu a hunin a lawmawm hle a ni, a ti. Bawlhlawh sawngbawl dan hrang hrang zingah khawpui pawn deuh emaw hmun awl lai emawa bawlhhlawh paih ringawt thin chu a tha lo hle a, environment, thing leh mau leh luite a tihchhiat/tih bawlhhlawh bakah mihring hriselna tan pawhin a pawi thei a ni tiin bawlhhlawh sawngbawl dan tha ber chu thil hman hnu hman leh (recycling) leh thil hman hnu tangkai taka thildang tih nana hman (reuse) hi a him ber a ni, a ti. Vawiina khawvelin hmasawnna hrang hrang a tleipui mek hi environment tichhe lova, thangthar la awmte tan he khawvel hi chentlakah hnutchhiah chu mi zawng zawng mawhphurhna a ni tiin Seminar hmanga mithiam rual fuankhawmte leh chhimtu zawng zawngten Mizoram leh hmun dangte tana hlawkpui thamin hun hmang turin a duhsakna a hlan a ni.

Seminar hawnnaah hian SE PHE Er.H.Duhkima pawhin thu sawiin sorkar laipuiin ramchhunga cheng mitin tan tui thianghlim pek chu a ngaih pawimawh ber zingah neiin National Policy-ah phei chuan ramchhunga tui awm zawng zawng hi mipuite ta a ni a, khua leh tui zawng zawngten tui thianghlim an dawn chu an chanvo dik tak a ni tiin tarlan a ni nghe nghe tih a sawi a. Mihring pung chho zelin tui mamawhna a tisang zel a, Mizoramah pawh ni 1-ah tui mamawh zat chu 617 lac-litre a nih laiin tui pek theih zat chu 492 lac-litre chauh a ni, a ti. Kumtin May-September thla inkarah fur ruahtui tam thin hle mahse a dahthat leh sawngbawlah harsatna an la tawk zel thu tarlangin Pu Duhkima chuan Lunglei khawpui nitin mamawh zat chu 450m3/h a nih laiin Lunglei chawmtu ber Tlawng lui pawh ni 24.3.2015-ah teh a nih khan 133m3/h-ah a tlathla tawh a ni, a ti. Vanneihthlak takin Mizoram-a tui chu bawlhhlawh (chemical content) a nei vak lova, sanwgbawl pawh a nuam hle thu a sawi a; PHE Department chuan theihtawp chhuah zelin tun atanga reiloteah Lunglei khawpui Veng thenkhatah chuan tui 24x7 pek theih thuai an beisei thu a tarlang bawk.

He hunah hian Dr.Rajendra Prasad, Convenver, MPL chuan Seminar neih chhan leh an hmalakn dante a tarlang a; Dr.Lalramzauva, Christian Hospital, Serkawn pawhin ‘Safe Water’ thupui hmangin power presentation a nei bawk. Regional Seminar-ah hian Mizoram University leh College hrang hrang bakah National Institute of Technical Teachers’ Training Research(NITTR), Kolkata; Hojai College, Assam leh Govt. Polytechnic, Patna atangin Resource Persons an rawn tel bawk a ni.