Mizoram chhim lam  Power Supply pekna tur line thar 132 KV Line (Alternative Line)Melriat to Khawiva via Buarpui Line siam hna kal mek chu vawiin khan Lunglei Power Circle hotute leh Lunglei District MJA-ten a hmunah tlawhin an enfiah. He hna kal mek enfiahna ‘Site Inspection’ hi Pukpui ah neih niin Er H. Zoliana, SE Lunglei Power Circle, Er Zodingliana, EE P&E, Pi C. Lalremruati, Lunglei DIPRO leh Lunglei District MJA-te an President Pu H. Lalthansanga hovin an tel a ni.

Er H. Zoliana chuan 132 KV Line (Alternative Line) Melriat to Khawiva via Buarpui Line chu India hmarchhaka hmasawnna ruhrel siamna tura  Sawrkar Laipui scheme Non-Lapsable Central Pool of Resources (NLCPR) kaltlanga ruahman a nih thu sawiin a hna pumpui approved cost hi Rs. 4176.07 lacs a nih thu a tarlang a. He hna thawktu contractor Tantia-NMTPL(JV)-te hi 31^st October, 2018-a thawkzo hman tura beisei niin tun dinhmunah za zela sawmriat leh pasarih (87%) chu zawh a ni tawh a. He hna hi tha taka zawhfel thuai anih theihna turin contractor te hnathawh hi P&E Department-in ngun taka an vil thu leh a hmuna an endik reng thu SE Lunglei Power Circle chuan a tarlang bawk.

132 KV Line-ah hian tower 242 awm tura ruamhan niin ban phunna tur laihzawl (Benching) 230 an zo tawh a, ban khur 223 zo tawhin Stub Setting (Concreting) 225 an zo tawh a, Tower Erection (Ban zawm chhoh tur) 156 an zo tawh a ni. He line hrui zam thui zawng tur 112.036 kms ah 60.447 kms zam zawh tawh niin 51.563 kms hmabak a la awm a ni. Hemi bakah hian Optical Ground Wire (OPGW) 34.655 kms zam zawh tawh niin 77.545 kms hmabak a la awm a ni. Tun dinhmunah hnathawktu mi 200 velin he hna hi an thawk mek a ni.

Site Inspection neih hnu hian Lunglei DIPRO office-ah inkawmhona hun hman niin hmalak zel dan tur leh hmachhawp hrang hrang te an sawiho a. MJA Lunglei District chuan 132 KV Line (Alternative Line) Melriat to Khawiva via Buarpui Line siam mek chak zawka hnathawha zawhfel thuai anih theihnan MJA Lunglei District Annual Conference 2018 ah Resolution anlo pass fel tawh a. He an Resolution bawhzuia hnathawhna a hmunah ngei kala an enfiah thei chu lawmawm an tih thu tarlangin hna tha taka zawhfel thuai a nih theihna tura hmalak chhunzawm zel an tum thu an tarlang a ni.