Vawiin khan Mizoram Chief Minister Pu Lal Thanhawla chuan  North Eastern Development Finance Corporation Ltd. (NEDFi) buatsaih lehkhabu pahnih Comprehensive Study on Skill Development in the State of Mizoram leh Project Profiles for Micro and Small Enterprises for Mizoram a tlangzarh.

Chief Minister Pu Lal Thanhawla chuan Skill Development leh sumdawnna lam hawia thalaite hmasawnna tur kawng dapa NEDFi in a bulthum atanga Mizoram dinhmun a zir chiang chu lawmawm a ti a. Sawrkar laipui pawhin hmarchhak state-te hi an danglam a, state dangte nena thuhmun veka cheibawl theih an ni lo tih a hriaa, hmarchhak bialten hmasawnna rahbi chakzawka an rah theihna turin thlir dan tlang dang atangin a thlir tawh a ni, a ti a. A hmun ngeiah luhchilha, Mizoram dinhmun zirchiang tura NEDFi an lo lut chu thil lawmawm tak a ni, a ti. Chief Minister chuan  Mizoram sawrkarin New Economic Development Policy (NEDP) kaltlangin Skill Development leh Entrepreneurship Development chak takin a kalpui mek tih sawiin thalai lehkhathiam, sumdawnna lama tuite tan kawng a hawn sak chu tam takin an chhawr tan tawh a ni, a ti a.  Heng lehkhabu pahnihte hi a kaihhnawih department ten uluk taka zirchiang a, hmang tangkai tura chahin sumdawnna bul tan tum thalaite pawhin tangkai taka an hman ngei a beisei thu a sawi a ni.

NEDFi hian State mipuite beisei leh mamawh hre rengin khawvel hmun danga thiamna mamawh a nih dan a thlir a. Mizoramin tun dinhmuna Skill Development a kalpui dan grassroot level atanga zirchiangin state chhung hmun hrang hrang an tlawh a. Chutah chuan thalai lehkhathiamte, zirlai te, school bansan tawh te, zirtirtute kawmin sawrkar department hrang hrangte, mimal Vocational Training Providers te leh sawrkar hnuaia ITI leh Polytechnic zirlai leh zirtirtute nen inrawnkhawmna a buatsaih a. Heng zirchianna atang hian Mizoram tana inhmeh leh thalaite tangkaipui ber tur niaa ngaih Strategic Reform Roadmap for Skill Development in Mizoram tih chu siamin kawng pariat pawimawh tak a thur chhuak a ni. Project Profiles for Micro and Small Enterprises for Mizoram-ah hian tun dinhmuna sumdawnna (entrepreneurship) kalpui mek dan leh industry te dinhmun an zir a. Sumdawnna kawnga tui thalaiten hma an sawn theih dan tur kawng pawimawh tak tak a kawhhmuh a ni.

Programme hi Planning Secretary Dr.C.VanlalramsangaÂ’n a kaihruai a. NEDFi Assitant General Manager Pu Shashank R Rai chuan Chief Minister in a tlangzarh tak lehkhabu pahnih nih phung tlangpui a sawifiah a. Zawhna leh chhanna hun hman zui niin NEDFi Aizawl Branch Manager Pu Mridul Borgohain chuan lawmthu sawiin hun tihtawp a ni.