Vawiin khan Food, Civil Supplies & Consumer Affairs  (FCS & CA) Department buatsaih, ‘End to End Computerization of TPDS Operation Scheme’ review meeting chu Hotel Regency Conference Hall, Zarkawt-ah neih a ni. He review meeting hi Pu Pramod Kumar Tiwari, IAS, Joint Secretary, Ministry of Consumer Affairs, Food & Public Distribution, Govt. of India chuan a kaihruai a, Mizorama FCS & CA Department dinhmun, hmalakna hrang hrang leh harsatna neihte ngun taka sawi leh ngaihtuah ho a ni.

He meeting-ah hian Public Distribution System (PDS) a chak zawk nan Mizoram-ah Buhfai qtls 1,050,000 chuang mamawh a nih avangin, thla tina Tide Over Allocation hi qtls 16,518.75 atangin  qtls 50,000 ni thei se tih leh Food Storage Depot District pali Siaha, Mamit, Serchhip leh Champhai-ah te a awmloh avanga harsatna an neih te Joint Secretary hnenah hian thlen a ni. Mizoram sawrkar chuan Aadhaar Seedling turin hma nasa takin a la a, May Ni 28, 2018 thleng hian Aadhaar Seedling percentage hi 79.73% niiin, heng zingah hian 57.57% chu NFSA Beneficiaries te an ni.

April Ni 25^th leh 26^th a Khrishi Bhawan-a ruahmanna neih angin Mizoram ah e-PDS May, 2018-ah hmantum chu remchanlohna avangin la neih theih a ni hrih lo a, he mi a tan hian Joint Secretary chuan State level-ah Pakhat leh District level-ah Pahnih chhawr tur mithiam awm se, a ti a. Hemi atan pawh hian hmalak pui a tum a ni.

Mizorama Supply Chain Management Policy a lo that zawk theihnan phai atanga mithiam chah chhuah tum a ni a, Food Calendar siam turin Joint Secretary hian District leh State Level Officers te a a chah a; Section 12, National Food Security Act, 2013 in a sawi anga Doorstep Delivery pawh tih changtlung zel tura ruahmanna siam a ni.

PDS hi Mizo District Council a nih hunlai a awm tawh niin, tun dinhmunah hian Principal Distribution Centre 13 leh Subsidiary Distribution Centre 19 leh Supply Centre 97 a awm a ni. NFSA, 2013 hi Mizoram-ah Marh Ni 1, 2016 atanga hman tan a ni a, Mizoram Sawrkar chuan Buhfai mimal tan Kg 5 dawn theih bakah, PHH Beneficiary tan kg 3 dang a pek belh a, NFSA in a huamloh mi 595,628 hnenah pawh Buhfai kg 8 thlakhata mi pakhat tana lak theih turin a buatsaih a ni.  Mizoram-ah hian NFSA (AAY, PHH) hnuaiah Ration Card 145,752 leh Non-NFSA (APL) hnuaiah 121,249 nei a chhinchiah a ni.

Meeting hi hian district hrang hrang a thawktu, Secretary, leh Joint Secretary, FCS & CA leh midangte an tel.