Vawiin khan Kumtluang Hall, CMO Office Mamitah National Health Mission (NHM) buatsaih ASHA Refresher Training 29th May - 7th June thleng neih tur hawnna hun hman a ni a. Dr.Lalrozama IAS, Mission Director, NHM chuan khuallian niin he hun hi a hmanpui.

Khuallian chuan thu sawiin Mamit District chu Aspirational District a nih avangin Health Department lamah tan nasa taka kan lak a tul a, hemi atan hian Mamit District chu a theihna  kawng hrang hrangah kan duhsak dawn a ni a ti. ASHA din a nih hma-a nu nau chunga thi leh nausen tam tak thi thin chu ASHA awm achinah chuan a tlem hle tawh a. Thingtlang kilkhawr zawk ami te pawhin Damdawi In leh PHC khera nau neih a him tih an hriat nachhan ber pawh ASHA-te an ni a, ASHA-te thurawn avanga nausen damlo dam chhuak leh pawh tam tak an awm mek a ni ti bawk. ASHA-te'n an thawh that leh thawh tam mila lawmman an lak ve thin Incentive pawh harsatna awm lova an dawn tur ang an dawn theih nan hmalakna kalpui mek a ni a. Chutih rualin hriatna kawngah inzir belh zel tur leh nu naupai leh damlote thurawn pek kawngah pawh an nihna hrechianga ramri chin hre turin a chah nghal bawk.

He hunah hian Dr. R. Lalchhuanawma, State Nodal Officer pawhin ASHA pawimawhna, an tangkaina leh mipuite'n ASHA kan hmelhriat a tulna kawng hrang hrang sawiin hnathawh hote anga lang, hna ropui tak thawktu nisi-te chu ASHA-te an ni a ti.

Dr. Hmingthanmawii, State Programme Officer pawhin ASHA tobul leh din a nih chhan chipchiar taka sawiin nausen thi zawng zawng 40% chu thla 1 tlin hma-a thi an nih avangin ASHA-te chu nausen pianghlimte ngaipawimawh lehzual tura chahin Training hlawhtling tak nei turin duhsakna a hlan.

Vawiin ASHA Refresher Training-ah hian ASHA tih tur leh ASHA hriat ngei ngei turte, Pregnancy Test chungchang, Nau nei tura inbuatsaihna (Birth Prepareness), Nu hriselna leh Home Visit/ Nausen enkawl nana Home Visit, Naupang hriselna, Assessment of Nutrition & Malnutrition, Nau neih hnua enkawlna chungchangte zirho niin State ASHA Trainers leh ASHA Coordinator-te'n zirtirna hi an pe a ni.

Vawiin Programme hi Dr.Zothankhuma Chhakchhuak, CMO Mamit-in a kaihruai a. Zawhna leh chhanna hun hman a nih bakah Mamit Health Department chhunga thawktu hrang hrangte'n Mission Director hi an harsatna tawh hrang hrangte an lo thlen bawk a ni. Training-ah hian Mamit khawpui chhung leh District chhung hmun hrang hranga ASHA-te an tel tha hle a ni.