Vawiin chawhma khan Lunglei RD Block chhunga Village Level Child Protection Committee-te tan YMA Sub-Hqrs Conference Hall, Lungleiah orientation programme buatsaih a ni a. Pu H. Lalrinpuia, SDO (Sadar) chu Khuallian a ni. 

Pu H. Lalrinpuia chuan naupangte parchhuak tura an lo pian angin, an than lenna kawngah mitinin mawhphurhna kan nei a ni, a ti a. Nu leh pa te pawh kan fate hremhmuna hruai thlengtu nilovin, vanram hruai thlengtu kan nih a ngai a ni, a ti. Naupang humhalhna kawngah Mizoramah pawh hma kan la a, khawvel hmun danga naupang laka suahsualna ang chi pawh Mizoramah kan la hmachhawn ve zel dawn a, chutiang laka kan hima, kan inven thiam theih nan tun aia nasa zawk a naupangte humhalhna kawngah tan kan lak leh zual a ngai a ni, a ti a. Dan hriat lohna hian min chhanhim silo a, chuvang chuan dan kan hriat a ngai a ni, a ti bawk. 

Pi Lalrinkimi Hmar, DCPO Lunglei chuan he programme hi kaihruaiin, Pi PC Laldingpuii, Protection Officer (IC) chuan Integrated Child Protection Scheme (ICPS) nihna leh a kalphungte zirtirna a nei a. Pi Jenifer Zonunfeli, Counselor chuan Value of Children in Society tih thupui hmangin zirtirna a pe a, Pi Julie Lalrinzami, CJM, Lunglei chuan Juvenile Justice Act, 2015 & POCSO Act, 2012 inhrilhhriatna leh zirtirna a nei bawk a ni.