Mission XI Million programme chu vawiin khan AR Lammual, Aizawlah neih a ni a. Youth Affairs and Sports changtu Union Minister Pu Vijay Goel chuan he hun hi a hmanpui. 

Pu Vijay Goel chuan Mission XI Million programme chu India ram puma school 15,000-a zirlai naupang maktaduai 11ten football-a hma an sawn theihna tur ruahmanna a ni tiin heng zinga za zela 15 vel zet an tuam tawh niin a sawi. Union Sports Minister chuan India Prime Minister Narendra Modi-a’n sports discipline hrang hrang hmasawnna turin theihtawp a chhuah a, India ram kiltina zirlai naupangte chu an tuina zawng tak sports discipline-ah an thiamna tihpun a nih theih nan hma a la a ni, a ti bawk. 

He huna thusawitu dang Mizoram Sawrkar Education Department changtu Pu H.Rohluna pawhin Mission XI Million Programme neihna tur India ram khawpui thlanchhuah zingah Aizawl a tel ve chu lawmawm a tih thu sawiin infiamna chi hrang hranga thalaiten hma an sawn theih State sawrkar chuan theihtawp a chhuah a ni, a ti. 

Mission XI Million Programme hi sawrkar laipuiin February ni 10, 2017 khan a tlangzarh a. FIFA Under-17 Football World Cup 2017 chu October thlaah India in a thlen dawn avangin sawrkar chuan inbuatsaih nan he programme hi a hmang a ni. He programme hi India ram mipuite zingah football tihlarna leh zirlai naupang zawkte talent tihpun a lo nih theihna tur hmanraw tangkai a nih beiseiin seminar, workshop, football-a inelna leh programme hrang hrang India ram khaw 31-ah a buatsaih a. Aizawl khawpui hi thlanchhuah zingah a tel a ni. Tun dinhmunah Mission XI Million programme hnuaiah hian Aizawl khawpui chhunga school 189 register an ni tawh a, he programme enkawlut Mizoram State Coordinator Pu Francis Paul hnenah registration hi tih chhunzawm zel theih a ni. 

Vawiin programme-ah hian Education Minister Pu H.Rohluna bakah Sports Minister Pu Zodintluanga, Parliamentary Secretary Pu Hmingdailova Khiangte, rampum huapa football khel thiam lar Jeje Lalpekhlua, Robert Lalthlamuana, S.Malsawmtluanga te bakah Mizoram Football Association hruaitute, sawrkar official-te leh Mission XI Million programme hnuaia in register school engemawzat an tel a ni.

Attachment

  • Loading attachment...