Vawiin khan Union Minister of State for Youth Affairs and Sports Pu Vijay Goel chuan Aijal Club-ah NYKS, NCC, NSS leh Sports Association te inkawmhona hun a hmanpui a. He hunah hian Mizoram Sports Minister Pu Zodintluanga’n a tawiawm a ni. 

Union Minister of State for Youth Affairs and Sports Pu Vijay Goel chuan Youth organisation hrang hrangte kawmna hun a nei thei chu lawmawm a tih thu a sawi a. Youth Organisation ten an tum ber chu thalaite tihhmasawn anih thu leh  hemi atan hian thalaite chu social work, infiamna, sawrkar leh khawtlang thiltiha tel tam a pawimawh thu a sawi a. Mizoramin YMA khawtlang tana tangkai em em leh thalaite kaihruaitu a nei chu lawmawm a tih thu a sawi bawk a. India ram puma NYKS (Nehru Yuva Kendra Sangathan) hmalakna te chu fakawm tiin Prime Minister pawhin ram leh hnam hmasawnna atan leh leadership trainingna atan NYKS ah thalaite tel nasa  tura a duh thu a sawi bawk a. Union Sports Minister chuan college a kal laia Basketball, Kho Kho te khel thinin debate-ah te a tel thin thu a sawia, hetianga alo tel thin avangin tun dinhmun thleng thei anih thu sawiin thalaite chu lehkha zirna lam chauh nilova infiamna leh activity hrang hranga tel thin turin a fuih nghal a ni. 

He hunah hian NYKS-in Mizorama an hnathawh hrang hrangte ngaihthlak niin Sports Association hruaitu te nena inkawmna neih chhunzawm nghal a ni a. Mizoram Badminton Association, Mizoram Boxing Association, Hockey Mizoram leh Mizoram Volleyball Association hruaituten an hmalakna leh thlen chin hrang hrangte tarlangin hmasawn zelna atana an mamawhte Union Sports Minister hnenah an thlen a. Pu Vijay Goel chuan theihtawpa hma a lakpui tur thu sawiin Mizoram thalaite chuan infiamna an ngainat angin  tanpui an phurawm thu a sawi bawk a. Cricket chauh lo, football, kho kho, badminton leh infiamna dangte tihhmasawn zel an tum thu leh State tina anmahni traditional games te chawikan an tum thu a sawi bawk a ni. 

Union Minister of State for Youth Affairs & Sports chuan Sports Ministry-in Sports Talent Search Portal an buaipui mekah tupawh kum 8 chunglam chuan an video leh bio-data te an dah thei anga Portal kaltlang hian SAI hnuaia an training na tur ngaihtuahsak anni dawn a ni, a ti a. Hei bakah hian Sports Ministry hmalakna hrang hrang te tarlangin Olympics 2020, 2024 leh 2028 inpuahchahna atan Scholarship cheng nuai 5 theuh, thalai 1000 hnenah kum 8 chhung pek anih tur thu a sawi bawk a. National Sports University Manipur-ah din anih tur thu leh state tinte thiambik infiamna  promote sak zel an tum thu Union Sports Minister chuan a sawi a. Mizoram thalaite eng infiamna ah pawh a thiam bik an awm anih chuan  Mizoram chhungah a theihloh pawhin state pawna an training na tur ngaihtuah sak zel a tum thu a sawi bawk a ni. 

Inkawmhona hun hi Parliamentary Secretary Sports & Youth Services Pu Hmingdailova Khiangte chuan a kaihruai a. Pu Lalrinzuala USAM (United Sports Association Mizoram) hnen atangin thusawi ngaihthlak a ni a. He hunah hian Sports & Youth Services Secretary PU H.L Rochungnunga , Sports Director Pu Zothanmawia te leh  SAI, NYKS, NCC, NSS, Sports Association hotute an tel kim hle a ni.