506/2025-2026

Lunglei, 2025 Ṭomir thla ni 8: Vawiin khan Lunglei Rural Development (RD) Block huam chhunga village disaster management committee (VDMC) te tan Education Conference Hall, District Election Office Complex, Lungleiah chhiatna (disaster) thlen thulha hma lak dan tur leh disaster kaihhnawiha VDMC mawhphurhna hrang hrangte zir hona buatsaih a ni.

He hun hi Lunglei District Disaster Management Authority (DDMA) Chief Executive Officer & Additional Deputy Commissioner Pi Rochuangkimi Khenglawt chuan hmanpuiin, training chu fur inṭan chho tur atana inbuatsaih lawkna a nih thu a sawi a. Chhiatna laka khawtlang himna tur te, chhiatna thlen thulha khawtlang mipuite'n chhawmdawlna leh ṭanpuina an hmuh thuai theih nan te VDMC member-te chuan tih tur leh mawhphurhna hrang hrang an nei tih sawiin, an tih tur leh mawhphurhna te ṭha taka hlen chhuak thei turin training chu chhawr ṭangkai tum turin a chah a. Fur lo thleng turah khuarel chhiatna hrang hrang thleng thei reng a nih avangin VDMC te chu inralring renga awm tur leh an mawhphurhnate ṭha taka hlen chhuah tum turin a chah a ni.

He training-ah hian Lunglei RD Block huam chhunga VDMC 46 aṭangin VDMC member eng emaw zat an tel a. Lunglei Block Development Officer Pu Lalremruata Sailo chuan inlawmna thu sawiin, resource person pahnih - Sub-Deputy Commissioner Pi Lalhlimpuii Pachuau leh DM&R Lunglei District Organiser Pi Chuaupari Pachuau te'n VDMC te hriat tur pawimawh hrang hrang an zirtir a. Disaster management chungchang leh VDMC mawhphurhna te, chhan chhuah hna thawh dan leh hliam bawihsawm dan te, SDRF Norms anga zangnadawmna pek theih chin te, Village DM Plan siam dan tur leh report pek dan tur te zir ho niin, zawhna leh chhanna leh sawi hona hun hman a ni bawk.

Attachment

  • Loading attachment...