505/2025-2026

AIZAWL; the 8^th May, 2025: Vawiin chawhma dar 11:00 khan Mizoram Chief Secretary Pu Khilli Ram Meena, IAS kaihhruaina hnuaiah Civil Defence Mock Drill review meeting chu CS Conference Room-ah neih a ni a. Vawiin Review meeting hi Mizorama District tina Deputy Commissioner leh Superintendent of Police ten Video Conferencing kaltlangin an chhim ve a ni.

Pu Khilli Ram Meena chuan indona lo thleng thulha chhiatna nasa tak thleng thei laka kan lo inven dan tur emaw a tuarnep deuh dan tur emaw hi tun atanga ruahmanna felfai tak siama, kan inpuahchah that a ngaih thu a sawi a. State leh District Level-a Advisory Committee din a tul thu te, District tina Satellite Phone 2 tal theuh neih a tul thu te, Hot Line mamawhna te, thingtlang kilkhawr zawka awmten information an dawn theih nan Akashvani hman tangkai thiam a tul thu a tarlang a. Indona a lo thlen thulha “Black out” pawimawhzia hi mipui ten an hriatchian hle a ngai a. A bik takin zirlai naupang te zingah Awareness campaign ngawrh taka kalpui a tul thu a tarlang bawk. Chief Secretary chuan district tin DC te chu an district theuh va Civil Defence Mock Drill hi lo buatsaih ve turin a chah hlawm bawk.

Vawiin meeting-ah hian Er.Lalhriatpuia, IAS Aizawl DC leh Chairman, DDMA, Aizawl district ni bawk chuan nimin Civil Defence Mock Drill kalpui dan chipchiar takin report  a pe a. Pu Anil Shukla IPS, DGP leh meeting member dang atangin feedback ngaihthlak a ni bawk. Nimin “Black out” kalpui chu  mipui ten an zawm that tawk loh thu leh beisei a phak lo deuh thu sawichhuah a ni bawk.

Vawiin meeting-ah hian District tina DC ten an district theuhva “Vital Installation” an neih dan chungchang Video Conferencing kaltlangin report an pe bawk a ni.