504/2025-2026

Thenzawl, the 8th May, 2025: Vawiin khan Chief Minister Pu Lalduhoma chuan a bial chhung Thenzawlah MzSRLM hnuaia din, Vantawng CLF Community Managed Training Centre thar a hawng a. Hei hi Mizorama CMTC hmasa ber a ni. A hawnna inkhawm hi Pu C. Lalsawivunga, AH & Vety Minister, Prof. Lalnilawma, RD Minister leh Pu V. Malsawmtluanga, MLA ten an telpui.

Thu a sawinaah Chief Minister chuan, Mizorama Community Managed Training Centre hmasa ber, Vantawng CMTC kan hawng thei hi a lawmawm a. Ka bial chhunga bul min tansak avangin kan Minister Prof. Lalnilawma leh MzSRLM thuneitute chungah lawmthu ka sawi a ni.  

Ka bial a nih vanga duhsak satliah in ni lovin ka hria a. Kan SHG ho nen hian ka office lamah pawh kan lo inhmu tawh a, an thilsiam chhuah te min rawn hmuhtir hlawm a. Duhsak tlakin hna an thawk niin ka lo hre ve a ni.

Mizote hi kan pi leh pute atanga lal rorelna hnuaia mawi taka lo nung za thin, thil tiho thiam, khawtlang pawimawh tinreng hnatlanga thawk dial dial thin kan ni a.

He kan thawhho thiamna, pi leh pute atanga kan chhawm, kan thisena bet tlat tawh hi kan eizawnna kawngah kan hman thiam chuan kan hlawkpui ngei ngei dawn a. Livelihood Missions pawh hian chu chu a rawn tinzawn a ni, a ti. Kan Self Help Group zawng zawngten taima takin, hlawhtlin ngei tumin lo bei thin ang che u. Kan ram economy ah danglamna nasa tak in thlen thei a ni, a ti.

CMTC chu mi tam takten eizawnna khawp thiamna an chharna hmun, SHG member te intuaihriamna hmun leh midangte tan pawha chhawr theih centre a nih ngei ka beisei a, Vantawng Cluster Level Federation hnuaia Self Help Group zawng zawng te ka lawmpui a ni, a ti a. Kan ram tharchhuah behchhan zela hmalakna kalpui thin turin a chah bawk. 

Pu C. Lalsawivunga, Minister pawhin thusawiin Thenzawl leh a chhehvel khuaa miten MzSRLM hmalakna hlawhtling taka in lo kalpui hi hmuhnawm ka ti a, in hmalakna hi ram tan a ni tih hrerengin taima takin, rinawm takin lo thawk zel ang che u, tiin a chah a ni.

Prof. Lalnilawma, RD Minister pawhin thusawiin, he centre hi pawl enkawl (community managed) tura din a ni a. Amah leh amah a inenkawl thei tura ngaih a ni. SHG kaltlang hian hmachhawp lian tak tak kan nei a, kan ram product te hi Brand pakhat hnuaia kalpui kan tum mek a, nu, kum khata cheng nuaih khat lalut phak lo te puala hmalakna te pawh kan kalpui dawn a ni. Heng kan hmalakna tinrengte hi khawtlang leh ram tan a ni tih hriain theihtawp in lo chhuah zel dawn nia, tiin a chah.

A hawnna inkhawm hi Pi Zosangzuali Pachuau, CEO, MzSRLM in a kaihruai a, Pu R. Zarzosanga, State Missions Director, MzSRLM chuan kal khawmte lawmna thu a sawi a, Dr. Malsawmtluanga Fanchun, District Missions Director leh PD, DRDO, Serchhip chuan technical report a pe a ni.

Pi Ramthianghlimi, President, Vantawng CLF pawhin thusawiin, an kal dan tlangpui a tarlang a. Mizorama CMTC hmasa ber an nei thei chu an lawm hle tih a tarlang.

Ministry of Rural Development kaihhruaina (Advisory) siam angin, CMTC-ah hian a hnuaia mi te hi  a awm tur a ni - Mi 30 atanga 60 leng Training Hall, a tlem berah mi 10 tal riah theihna Dormitory/Room. Ei leh in buatsaih theihna choka/kitchen leh SHG member ten a tul anga an dawr tur CLF office te a awm tur a ni. 

Vawiina Chief Minister-in a hawn Vantawng CLF CMTC hi Mizorama a hmasa ber a ni a, kum hnih chhungin Mizoram district tinah din hman an tum. Vantawng CLF hnuaiah hian Bungtlang, Keitum, Hriangtlang, Thenzawl, Zote South, Buangpui, Neihloh leh Kanghmun South khua te an awm a ni.