503/2025-2026 

Dated Serchhip, the 8^th May, 2025: Vawiin khan DC Pu Paul L Khuma hovin Serchhip District Water & Sanitation Mission member te DC meeting Hall ah an thukhawm. 

DC Pu Paul L Khuma chuan tui leh thianghlimna hian kan hriselna a nghawng a, chu chuan hlawk zawka hna kan thawh theihna a hril a; mihring khawsak tih hmasawnna atana thil pawimawh a nih avangin District Planning Framework duan mekah pawh telh a nih tur thu a sawi.  

Kumin atana District Water & Sanitation Mission thutkhawm vawikhatnaah hian Member Secretary Pu Isaac Lalchhuanmawia, Sr. EE PHE chuan tui leh thianghlimna kawnga an hmalakna hrang hrang report a tarlang a. Jal Jeevan Mission hi za ah za thawh zawh tawh niin he mission in a huam khaw 35 te chu tui connection pek tawh Har Ghar Jal Village ah puan an ni tawh a ni. JJM in a huam loh khuaah te scheme dang hmanga hmalak mek a ni bawk a. NABARD sum atang te, AMRUT 2.0 leh NESIDS atanga sum hmuh hmangin JJM in a huam loh khua ah te Water Supply Scheme siam mek a ni a; hei bakah hian Water Supply Scheme hman mek chei that leh tihchangtlun nan sum hman a ni bawk. Serchhip khawpui bikah nitin tui litre nuai 20 atanga 24 inkar vel pump thin a ni a, Pump House atanga tuidahkhawlna hmunpui thlunzawmtu rising main hlui tawh chu a aia lian leh tha zawkin thlak mek a ni a. Tui dahkhawlna zem lian ber main reservoir atangin tui a put tih hriat a ni a, a siamthat dan tur ruahman mek a ni bawk.  

Serchhip District chhunga khaw thenkhatah tui hniang hnara dawng thei lo leh tui connection la peih fel lohna khaw tlem la awm chungchang sawi ho a ni a. Tui hna kam chak lutuk avang te, scheme in compensation a huam tel loh avanga ram chungchanga buaina awm te, a panna tur kawng siamna tur scheme in a huam tel loh avanga harsatna awm te sawi lan a ni bawk. 

Swachh Bharat Mission 2.0 hnuaiah Serchhip District chu Mizoram chhunga ODF plus ni thei hmasa ber District pathum zingah a tel a. Bawlhhlawh sawngbawlna tur hmun Plastic (solid) Waste Managment Centre, New Serchhip Lungrual rama siam mek pawh hman theih tura peihfel tep a ni tawh a. Darkar khata bawlhhlawh kg 45 halral thei tur Smokeless Incinerator chu chah thlen tawh niin Mizoramah he khawl hi Serchhip District hian a hmang hmasa ber dawn a ni. Bawlhhlawh sawngbawlna hmun hi mipuiin tangkai taka an hman theih nan a huam chin khaw hrang hrangah kalin PHE Department te hian mipui an zirtir dawn a ni.  

Vawiin meeting-ah hian official te bakah khawtlang hruaitute an tel a ni.