No.5558/2020-2021

Vawiin khan Lunglei Sanitation Task Force chu an Chairman Pu V. Lalsangliana, Deputy Commissioner kahhruaiin a office chamber-ah an thutkhawm. UD&PA Department buatsaih ‘Mizoram Khawpui Fai Inelna-2020’ atana Lunglei District inpuahchah dan tur leh Cleanliness Week – 2020 hman dan tur an rel.

Lunglei Sanitation Task Force Committee-ah hian a kaihhnawih department hrang hrang official-te bakah YMA, MUP, MHIP leh Clean Lunglei aiawhte an tel a ni.

Meeting-ah hian kum kaltaa Lunglei Sanitation Task Force Committee hmalakna hrang hrang thlirletna leh sawihona neih niin Cleanliness Week – 2020 hman dan tur leh ‘Mizoram Khawpui Fai Inelna-2020’ atana Lunglei District inpuahchah dan tur chipchiar taka sawiho a ni a. He hun kaihruaitu Lunglei DC Pu V.Lalsangliana chuan Lunglei Sanitation Task Force Committee chu khawpui faina leh thianghlimna ah thuneihna sang tak nei a nih thu tarlangin Lunglei khua in faina kawnga hma a sawn zel theihnan Task Force member-te chu theihtawp chhuah theuh turin a chah a. District Capital fai ber kan nih theihna atana hmalakna tur pawimawh leh inbuatsaihna tur chhawpchhuah te a taka puitlin ngei tura thawhpuiah Lunglei mipuite a sawm nghal a ni.

Vawiin meeting chuan Cleanliness Week – 2020 hawnna inkhawm chu 02/10/2020 (Friday) zing dar 8:30 ah Convention Centre ah neih ni se tih a rel a. Covid-19 hrileng avangin mipui tam tak a inkohkhawm theih dawnloh avangin Lunglei Sanitation Task Force Committee member-te bakah sawm bik dang mi tlem te nen hawnna program hi hman ni se tih a rel a. Kum danga lo tih thin tawh angin Faina Hapta 2020 pual hian faina intihsiakna buatsaih leh tur niin category hrang hrang hengte - sawrkar pisa, school, restaurant/motel, Hotel, Hospital, VC Area/ Veng, Bazar/ Market-te intihsiakna buatsaih a ni dawn a. Meeting chuan Faina Intihsiakna ah hian Category thar pakhat dah belh relin motor siamna workshop-te chu faina lamah endik an ni dawn bawk a ni. Heng category hrang hrang endiktu tur pawh hi ruat thar an ni. Week kharna (Closing) hi siam hran lovin Ocotber thla chhung hi endik hunah ruat niin 26th January, 2021 (Republic Day) lawmnaah lawmman sem tur a ni.