Lawngtlai, Mimkut thla ni 29, 2020: Lai Autonomous District Council (LADC)-a Member of District Council (MDC) inthlan lo awm tawha a dingte leh tlingte dinhmun leh thil pawimawh hrang hrang tar lanna lehkhabu, "Members of District Council - Lai Autonomous District Council Election Results & Statistics" tih bu, LH Hauheng (H. Lalhmingmawia) ziah chu vawiin khan Lawngtlai DC Conference Hall-ah Bawrhsap Dr Andrew H. Vanlaldika, MCS chuan a tlangzarh.

Dr H. Vanlaldika chuan lehkhabu pakhat lek pawh khawr pum a harsain, taimakna leh thawhrimnna tel lo chuan puitlin theih a ni lo tih sawiin, LADC huam chhunga chengte mai bakah, LADC chanchin la zir chiang duhte tana lehkhabu chhenfakawm tak tur a buatsaih theih avangin a ziaktu chu chhuanawm a tih thu a sawi a. Electronic media leh social media thang chho zelin lehkhabu ngaihhlutna a tihhniam nasat hle laiin, lehkhabu hlutna tak tak erawh a ngai reng a, thiamna tak tak paw chhuak tur chuan chhut chhuah ngei lehkhabu chhiar tam leh zir peih a pawimawh tih sawiin, Lawngtlai District atangin ziak mi lo chhuak zel se a duh thu a sawi.

He lehkhabu tlangzarh hun hi Rameng chanchinbu Editor Pu H. Lalrinmawia'n kaihruaiin, Rev. TC Lalhunropuia'n hunserh a hmang a. Mizoram Journalists' Association (MJA) Lawngtlai District President Pu Lalngheta Ralte chuan lehkhabu thlir lawkin, a ziaktu LH Hauheng bakah, mi hrang hrang thu sawi ngaihthlak a ni a. Upa H. Thangrivunga'n lawm thu sawi leh tawngtaiin hun a khar a ni.

Vawiina tlangzarh tak lehkhabuah hian Pawi-Lakher Regional Council inthlan tum 4 (1954, 1959, 1964 & 1970), Pawi Autonomous District Council inthlan tum 4 (1973, 1977, 1982 & 1988) leh Lai Autonomous District Council inthlan tum 6 (1992, 1997, 2002, 2005, 2010 & 2015) result bakah, Lawngtlai District chhunga Members of Legislative Assembly (MLA) inthlan result te a chuang a ni.