No.5560/2020-2021

Mamit 29th September, 2020 : Nizan khan Mamit District chhung khawthlang lam Bangladesh nena inrina-a duty 90th Bn. BSF-te chuan dan loa tawlhruk Silai AK-47 (28), AK-56 (1), Carbine - (1) avaiin Silai 30 leh a mu thahnem tak an man.

He thu hriat a nih veleh hian Pu Shashank Jaiswal SP, Mamit chuan tukin khan Phuldungsei hi pan nghalin, a hmunah tihfel ngaite tihfel nghal a ni a. BSF,IG leh SP-te hian vawiin khan SP Office rawn chho nghalin, Silai tawlhruk man chungchangah hian DIPRO, Mamit leh thutharthehdarhtute kawmna an nei nghala. Pu Sunil Kumar, IG BSF chuan nizana Phuldungsei khaw bula man tak silai leh a mu thahnem tak hi a neitu leh mawhphurtua rinhlelh mi pathum (3) man tel an nih thu a sawi a. Heti zat a tam Silai hi khawilama tawlhruk tur nge tun dinhmunah hriat a nih loh thu sawiin, Myanmar lam atanga rawn kal nia hriat a nih thu a sawi bawk. BSF, IG hian Silai thahnem tak man a nih theih nachhan chu hmun hrang hrang atanga Intelligence dawn atang a nih thu sawiin an thawhhona-ah lawmthu a sawi a. Local mite atang pawhin tawiawmna nasa tak an dawn thu sawiin an chungah lawmthu a sawi bawk.

BSF te'n Silai leh a mu an man taka, mawhphurtu nia rinhlelhte hi Marpara Police Station-ah Arms Act 1959 hnuaiah thubuai ziahluh nghal an ni a. Thu zawh fiah turin Mamit Police Station-ah lak chhoh rih an ni ang.

Vawiin thutharthehdarhtute kawmna hunah hian BSF DIG, Addl SP, Mamit bakah SIB mite an tel a ni.