502/2026-2027

Lunglei, 2026 Ṭomir thla ni 13: Nizan khan Sikulpui Hall, Serkawn, Lungleiah 40 Days Healthy Lunglei Campaign hun hman niin, hriselna chungchang leh LushAI Healthy Lunglei App chungchang inzirtir a nih bakah, a thlawnin kal khawmte hriselna dinhmun endiksak an ni.

YMA Serkawn Branch President Pu P. Lalrimawia'n hun kaihruaiin, Lunglei Sub-Deputy Commissioner Pu Benjamin Lalrinawma'n 40 Days Healthy Lunglei Campaign chungchang a sawi zau va. Hriselna kaihhnawiha tih tur leh tih loh turte ṭha taka zawm tur leh LushAI Healthy Lunglei App chu hman ṭangkai tum ṭheuh turin kal khawmte a chah.

Urban Primary Health Centre (UPHC) Hrangchalkawna Medical Officer Dr VL Hrechianga chuan natna inkai chhawn theih loh (non-communicable disease) chungchang te, NCD laka inven dan leh nunphung hrisel neih pawimawhna te, hriselna atana tih tur leh tih loh tur hrang hrangte a zirtir a. Data Entry Operator Pu K. Hmingthanmawia'n LushAI Healthy Lunglei App chungchang sawi fiahin, application hman dan a takin a zirtir a. Kal khawmte'n a hmunah LushAI Healthy Lunglei App chu an mobile phone-ah an dah lut (install) nghal bawk.

He hunah hian YMA member leh khawtlang mipui mi 60 chuang an tel a. Medical Team te'n health screening buatsaih chhunzawmin, mi 60 te hriselna dinhmun endik a ni.

40 Days Healthy Lunglei Campaign kalpui chhung hian YMA branch hrang hrang leh college-ah te hriselna dinhmun endikna (health screening) te, hriselna leh LHL App chungchang inzirtirna leh intihsiakna te buatsaih ṭhin a ni dawn a. Ni 40 chhunga campaign zawh hnuah App download tam leh hmang ṭhate hnenah lawmman siam tum a ni bawk.

LushAI Healthy Lunglei app hmang hian district chhunga sawrkar damdawi in leh health centre-a daktawrte ṭhut hun tur a en theih bakah, OPD-a inentir turin appointment a lak lawk (book) theih a. ABHA-a inziah luhna te, he app-a inziak lut damdawi dawr (pharmacy)-te aṭanga damdawi chah theihna te awmin, hriselna lama hriat tur pawimawh hrang hrangte pawh awlsam takin a hmuh theih a. OPD appointment laknaa pui thei tur leh zawhna hrang hrang Mizo ṭawnga chhang thei tur AI chatbot dah tel a ni bawk a. Android hmangte tan https://play.google.com/store/apps/details?id=com.lushaihealthylunglei.android aṭangin leh iOS hmangte tan https://apps.apple.com/in/app/lhl/id6755673586 aṭangin download theih a ni.